آبنائے ہرمز میں جنوبی کوریا کے جہاز پر دھماکے کے بعد آگ لگ گئی
غیر ملکی میڈیا کے مطابق یہ واقعہ سیئول کے وقت کے مطابق رات تقریباً 8 بج کر 40 منٹ پر پیش آیا، جب جنوبی کوریا کی ایک شپنگ کمپنی کے زیر انتظام جہاز پر دھماکا ہوا اور اس کے بعد آگ بھڑک اٹھی۔
حکام کے مطابق جہاز آبنائے ہرمز کے اندر متحدہ عرب امارات کے پانیوں کے قریب لنگر انداز تھا۔
جنوبی کوریا کے حکام نے بتایا کہ جہاز پر موجود تمامعملے کے 24 افراد محفوظ رہے اور کسی جانی نقصان کی اطلاع نہیں ملی، عملے میں 6 جنوبی کوریائی شہری جبکہ 18 غیر ملکی باشندے شامل تھے۔
جنوبی کوریا کی وزارت خارجہ کے مطابق دھماکے اور آگ لگنے کی وجہ کے ساتھ ساتھ جہاز کو پہنچنے والے نقصان کی نوعیت کا جائزہ لیا جا رہا ہے، حکام اس بات کی تحقیقات کر رہے ہیں کہ واقعہ تکنیکی خرابی، حادثے یا کسی بیرونی عنصر کے باعث پیش آیا۔
متاثرہ جہاز کی شناخت ایچ ایم ایم نامو کے نام سے ہوئی ہے، جو تقریباً 180 میٹر طویل مال بردار جہاز ہے،میری ٹائم ٹریکنگ ڈیٹا کے مطابق یہ جہاز پاناما کے پرچم تلے سفر کر رہا تھا۔
خیال رہے کہ آبنائے ہرمز عالمی تیل اور تجارتی ترسیل کے لیے انتہائی اہم راستہ ہے، اسی لیے اس علاقے میں کسی بھی واقعے کو عالمی توانائی منڈیوں کے لیے حساس سمجھا جاتا ہے۔
یہ واقعہ ایسے وقت میں پیش آیا ہے جب خطے میں پہلے ہی کشیدگی میں اضافہ دیکھا جا رہا ہے۔
یہ بھی پڑھیں: ایران کا آبنائے ہرمز میں ابوظہبی کے آئل ٹینکر پر حملہ
جنوبی کوریا کی وزارت خارجہ کا کہنا ہے کہ کورین حکومت متعلقہ ممالک کے ساتھ قریبی رابطے میں رہے گی اور آبنائے ہرمز میں کورین جہازوں اور عملے کے تحفظ کے لیے ضروری اقدامات کیے جائیں گے۔
حکام کے مطابق جہاز اور عملے کی سلامتی اولین ترجیح ہے جبکہ واقعے کی مزید تفصیلات تکنیکی جائزے کے بعد سامنے آئیں گی۔
