ایران کا آبنائے ہرمز میں ابوظہبی کے آئل ٹینکر پر حملہ
یو اے ای حکام کی جانب سے حملہ کی تصدیق کرتے ہوئے بتایا گیا ہے کہ ایران نے یواےای کے آئل ٹینکر پر دو خودکش ڈرونز سے حملہ کیا۔
اماراتی وزارت خارجہ نے حملے کی سخت الفاظ میں مذمت کرتے کہا کہ ایران آبنائے ہرمز کو بطور ہتھیار استعمال کر کے قذاقی کر رہا ہے، خوش قسمتی سے حملہ میں کوئی جانی نقصان نہیں ہوا۔
قبل ازیں ایرانی پاسداران انقلاب کی جانب سے امریکی جنگی بحری جہاز کو نشانہ بنانے کا دعویٰ کیا گیا۔
ایرانی حکام کے مطابق امریکی بحریہ کا ایک جنگی جہاز ایرانی جزیرے جسک کے قریب پہنچا، جس پر پہلے وارننگ جاری کی گئی، تاہم وارننگ کو نظر انداز کرنے پر ایران کی جانب سے دو میزائل داغے گئے۔
ادھر علاقے میں بڑھتی ہوئی کشیدگی کے ساتھ ایران کے پاسداران انقلاب نے آبنائے ہرمز کا ایک نیا نقشہ بھی جاری کیا ہے، جس میں اس اہم سمندری گزرگاہ کے ان حصوں کو دکھایا گیا ہے جو ایرانی مسلح افواج کے زیر کنٹرول یا زیر انتظام ہیں۔
یہ بھی پڑھیں: ایران کا آبنائے ہرمز میں امریکی جنگی بحری جہاز پر حملہ
خبر ایجنسی کے مطابق اس نقشے میں ایران کے کوہ مبارک سے لے کر متحدہ عرب امارات کے شہر فجیرہ کے جنوبی حصے تک کا علاقہ شامل کیا گیا ہے۔
اس کے علاوہ ایران کے جزیرہ قشم اور متحدہ عرب امارات کے ام القوین کے درمیان واقع سمندری حدود کو بھی نقشے میں شامل کیا گیا ہے۔
