ایران کی مذاکرات سے متعلق نئی تجاویز پاکستان کے حوالے کرنے کی تصدیق
ایرانی سرکاری خبر ایجنسی ارنا کو دیے گئے ایک انٹرویو کے دوران پاکستان میں ایرانی سفیر رضا امیری مقدم نے کہا کہ امریکا سے مذاکرات کا انحصار اس کے رویے پر ہے، پاکستان کی ثالثی اب بھی برقرار ہے۔
ایرانی سفیر نے ایران کی جانب سے نئی تجاویز پاکستان کے حوالے کرنے کہ تصدیق کر تے ہوئے کہا کہ تہران اپنے مؤقف اور مطالبات میں مکمل واضح ہے،امریکہ پر منحصر ہے کہ وہ واقعی مسائل کے حل اور مذاکرات میں پیش رفت کا خواہاں ہے تو طرزِ عمل تبدیل کرے۔
رضا امیری مقدم کا کہنا تھا کہ ایران کا نیا مذاکراتی منصوبہ، امریکی اور صہیونی جارحانہ جنگ کے خاتمے کے لیے تیار کیا گیا ہے، ایرانی تجاویز گزشتہ دنوں موجودہ عمل کے مرکزی ثالث پاکستان کے حوالے کی جا چکی ہیں۔
انہوں کہا کہ پاکستانی دوستوں نے ایرانی تجاویز کو امریکی فریق تک بھی پہنچا دیا ہے، ایران کی جانب سے پاکستان کے ذریعے تازہ امن تجویز بھجوائے جانے کی تصدیق متعدد بین الاقوامی ذرائع نے بھی کی ہے۔
یہ بھی پڑھیں: ایران پاکستان میں مذاکرات کیلئے تیار ہوگیا، امریکی اخبار
ایرانی سفیر کا کہنا تھا کہ ایران اور امریکا کے درمیان جاری موجودہ سفارتی عمل میں پاکستان ہی بنیادی ثالث ہے، پاکستان جنگ کے خاتمے اور معاملات کے حل کے لیے قابلِ قدر کوششیں کر رہا ہے۔
رضا امیری مقدم نے کہا کہ ایرانی قیادت پاکستانی برادران کی ان کوششوں کو سراہتی ہے، پاکستان اب بھی ثالثی کے کردار میں موجود ہے، ایران نے کسی بھی سطح پر ثالث کی تبدیلی کا کوئی فیصلہ نہیں کیا۔
ان کا مزید کہنا تھا کہ پاکستان کی ثالثی پر بظاہر امریکی فریق کی پوزیشن بھی ایران سے ملتی جلتی ہے، پاکستان کی وساطت سے پیغامات کے تبادلے اور سفارتی رابطوں کا سلسلہ جاری ہے۔
