ایران پاکستان میں مذاکرات کیلئے تیار ہوگیا، امریکی اخبار
امریکی اخبار کی جانب سے جاری کردہ رپورٹ کے مطابق ایران نے ممکنہ طور پر امن عمل کو آگے بڑھانے کیلئے اپنی بعض شرائط میں نرمی کا اشارہ بھی دیا ہے۔
رپورٹس کے مطابق ایران نے جنگ کے مستقل خاتمے کیلئے پاکستان کو ایک تجویز پیش کی، جبکہ اس نے ناکہ بندی ختم کرنے کی شرط سے وقتی طور پر دستبرداری اختیار کر لی ہے۔ یہ پیش رفت خطے میں امن و استحکام کیلئے مثبت اشارہ سمجھی جا رہی ہے۔
ذرائع کا کہنا ہے کہ ایران کی جانب سے جوہری اور میزائل پروگرام سے متعلق معاملات پر بات چیت فی الحال مؤخر کر دی گئی ہے، تاہم ان حساس موضوعات پر مستقبل میں مذاکرات کا امکان برقرار ہے۔
رپورٹ میں یہ بھی کہا گیا ہے کہ ایران ان معاملات پر بات چیت کے بدلے امریکا سے پابندیوں میں نرمی کا خواہاں ہے۔
تجزیہ کاروں کے مطابق اگر پاکستان میں ہونے والے یہ مذاکرات کامیاب رہے تو خطے میں جاری کشیدگی کم ہو سکتی ہے اور سفارتی تعلقات میں بہتری کا راستہ ہموار ہو سکتا ہے۔ پاکستان کا کردار اس حوالے سے ایک اہم ثالث کے طور پر سامنے آ رہا ہے۔
یہ بھی پڑھیں:ویزٹ ویزے پر حج کے خواہمشمندوں کیلئے اہم خبر
واضح رہے کہ حالیہ مہینوں میں مشرق وسطیٰ کی صورتحال خاصی پیچیدہ رہی ہے، اور ایسے میں مذاکرات کی بحالی کو ایک مثبت قدم قرار دیا جا رہا ہے۔
