متحدہ عرب امارات کا اوپیک اور اوپیک پلس سے علیحدگی کا اعلان

امارات نیوز ایجنسی کے مطابق اوپیک اور اوپیک پلس سے علیحدگی کا فیصلہ یکم مئی 2026 سے نافذ العمل ہوگا۔ حکام کا کہنا ہے کہ یہ فیصلہ توانائی پالیسی میں نئی حکمت عملی کے تحت کیا گیا ہے۔
واضح رہے کہ اوپیک کا قیام 1960 میں عمل میں آیا تھا، جس کا مقصد رکن ممالک کے درمیان تیل کی پیداوار اور قیمتوں میں توازن برقرار رکھنا ہے۔ اس تنظیم کے اہم ارکان میں سعودی عرب، ایران، عراق اور کویت شامل ہیں۔
اوپیک پلس ایک وسیع اتحاد ہے جس میں روس سمیت دیگر تیل پیدا کرنے والے ممالک شامل ہیں، اور یہ اتحاد عالمی سطح پر تیل کی پیداوار اور قیمتوں کے تعین میں اہم کردار ادا کرتا ہے۔
ماہرین کے مطابق متحدہ عرب امارات کی علیحدگی سے عالمی تیل کی سپلائی اور قیمتوں میں اتار چڑھاؤ کا امکان ہے، جبکہ توانائی کی عالمی منڈی میں نئی صف بندی بھی دیکھنے میں آ سکتی ہے۔
اس پیش رفت کے بعد عالمی معاشی حلقوں اور توانائی ماہرین کی نظریں آئندہ صورتحال پر مرکوز ہیں۔