امریکی میڈیا سے گفتگو کرتے ہوئے صدر ٹرمپ کا کہنا تھا کہ ایران کے ساتھ سیز فائر بدھ کی شام ختم ہو جائے گا، معاہدہ نہ ہوا تو سیز فائر میں توسیع کا کوئی امکان نہیں ہے، ایران کو بہت اچھی ڈیل آفر کی ہے، ہم کسی جلد بازی میں نہیں کہ بُرا معاہدہ کر لیں۔
انہوں نے کہا کہ ڈیل نہ ہونے کی صورت میں جنگ یقینی ہے، معاہدہ نہ ہوا تو بہت سارے بم پھٹنا شروع ہو جائیں گے۔
ایران کی مذاکرات میں عدم شرکت کے سوال پر امریکی صدر کا کہنا تھا کہ ایران کو مذاکرات میں وہاں ہونا چاہیے، ہم نے وہاں ہونے پر اتفاق کیا تھا، حالانکہ وہ کہتے ہیں کہ ہم نے نہیں کیا لیکن یہ طے پایا تھا، ہم دیکھیں گے کہ وہ وہاں ہوتے ہیں یا نہیں، اگر وہ وہاں نہیں ہوتے، تو وہ بھی ٹھیک ہے۔
یہ بھی پڑھیں: ایران معاہدے پر آج اسلام آباد میں دستخط ہوں گے، ٹرمپ کا دعویٰ
ایک سوال کے جواب میں ڈونلڈ ٹرمپ نے کہا کہ ہمارا مؤقف واضح ہے ایران کے پاس ایٹمی ہتھیار نہیں ہونے چاہئیں ہم اس کے سوا کسی چیز پر بات نہیں کر رہے، میں نے مذاکرات کے لیے اپنی اے ٹیم بھیجی اور اس سے بہترین کا کہا ہے۔
امریکی صدر کا کہنا تھا کہ ایران تنازع ختم ہو تو تیل کی قیمتیں تیزی سے نیچی آئیں گی، اگر ایران وہ کرتا ہے جو اسے کرنا چاہیے، تو تیل کی قیمتوں میں بہت تیزی سے کمی آئے گی۔
