سینئرایرانی عہدیدار نے خبرایجنسی رائٹرز سے گفتگو میں بتایا کہ ایران امریکا کےساتھ مذاکرات میں شرکت پر غور کر رہا ہے، ڈیڈلاک کے خاتمے کے لئے پاکستان کی مثبت کوششیں جاری ہیں۔
دوسرے جانب امریکی اخبار ٹیلی گراف کے مطابق امریکا بھی آبنائے ہرمز کی ناکہ بندی ختم پر غور کر رہا ہے، امریکی صدر ڈونلڈ ٹرمپ آبنائے ہرمز کی ناکہ بندی ختم کرنے پر غور کر رہے ہیں۔
یاد رہے کہ گزشتہ روز ایران نے امریکا کے ساتھ ہونے والے مذاکرات میں شرکت سے انکار کر دیا تھا۔
ایران کی سرکاری نیوز ایجنسی ارنا کی جانب سے سماجی رابطوں کی ویب سائٹ ایکس (سابقہ ٹویٹر) پر جاری ایک پیغام میں بتایا گیا تھاکہ ایران امریکا کےساتھ مذاکرات کے دوسرے دور میں شامل نہیں ہو گا۔
ایرانی سرکاری نیوز ایجنسی کے مطابق واشنگٹن کے بے جا مطالبات پر مذاکرات میں شرکت نہیں کریں گے، امریکا ایران سے غیر حقیقی توقعات کر رہا ہے، امریکا کے مؤقف میں ہر لمحہ تبدیلی آ رہی ہے۔
یہ بھی پڑھیں: ایران کا مذاکرات کے دوسرے راؤنڈ میں شرکت سے انکار
ایران کی جانب سے کہا گیا کہ امریکی مؤقف تضادات کا شکار ہے،ایرانی بندرگاہوں کی ناکہ بندی جنگ بندی معاہدے کی خلاف ورزی ہے، ان حالات میں مذاکرات کے دوسرے دور میں شرکت نہیں کر سکتے۔
ادھر ترجمان ایرانی وزارت خارجہ اسماعیل بقائی نے کہا کہ امریکہ کے ساتھ مذاکرات کے دوسرے دورمیں شرکت کا ارادہ نہیں، دوسرے دور کے مذاکرات کیلئے ایرانی وفد پاکستان نہیں جائے گا، فی الحال واشنگٹن بات چیت کا ارادہ نہیں، موجودہ حالات میں امریکہ کے ساتھ بات چیت ممکن نہیں۔
ان کا کہنا تھا کہ ایران کو امریکہ پر اعتماد نہیں، غزہ، لبنان، ایران میں جنگی جرائم پر یورپ نے کوئی واضح مؤقف نہیں اپنایا، امریکہ کا مؤقف اور مطالبات بدلتے رہتے ہیں جو بات چیت کی راہ میں رکاوٹ ہیں، مذاکرات کے لیے امریکہ سنجیدگی کا مظاہرہ نہیں کرتا۔
