غیر ملکی خبر ایجنسی کے مطابق عراق کے شہر اربیل کے ایئرپورٹ کے قریب زور دار دھماکے کی آواز سنی گئی، جس کے بعد سیکیورٹی ادارے فوری طور پر حرکت میں آ گئے، تاہم ابتدائی اطلاعات کے مطابق کسی جانی نقصان یا بڑے مالی خسارے کی تصدیق نہیں ہو سکی۔
دوسری جانب کویت میں بھی صورتحال کشیدہ ہو گئی ہے، جہاں ڈرون حملے کے نتیجے میں کویت انٹرنیشنل ایئرپورٹ کو نقصان پہنچا ہے۔
کویتی سول ایوی ایشن اتھارٹی کا کہنا ہے کہ حملے سے ایئرپورٹ کے ریڈار نظام کو شدید نقصان ہوا، تاہم خوش قسمتی سے کوئی جانی نقصان رپورٹ نہیں ہوا۔
ایرانی فوج کے ترجمان ختم الانبیاء ہیڈکوارٹر کی جانب سے دعویٰ کیا گیا ہے کہ سعودی عرب کے علاقے الخرج میں واقع امریکی ایئر بیس کو میزائل اور ڈرون حملے کا نشانہ بنایا گیا۔
یہ بھی پڑھیں:جنگ بندی کی امریکی تجاویز غیر منصفانہ ہیں: ایران
ترجمان کے مطابق اس کارروائی کے دوران ایک امریکی ری فیولنگ طیارہ مکمل طور پر تباہ جبکہ مزید تین طیارے شدید نقصان کے باعث ناکارہ ہو گئے ہیں۔
تجزیہ کاروں کا کہنا ہے کہ اگر یہ کشیدگی مزید بڑھی تو خطے میں بڑے پیمانے پر تصادم کا خطرہ پیدا ہو سکتا ہے، جس کے عالمی امن پر بھی گہرے اثرات مرتب ہوں گے۔
