ابتدائی معلومات کے مطابق طیارہ انجن فیل ہونے کے باعث حادثے سے دوچار ہوا۔ فنی خرابی کے بعد پائلٹ نے بروقت فیصلہ کرتے ہوئے خود کو ایجیکٹ کر لیا، جس کے نتیجے میں وہ محفوظ رہا۔ پائلٹ کو فوری طور پر طبی معائنے کیلئے قریبی اسپتال منتقل کیا گیا، جہاں اس کی حالت تسلی بخش بتائی جا رہی ہے۔
حادثے کے بعد مقامی انتظامیہ، پولیس اور فضائیہ کے اہلکار فوری طور پر جائے وقوعہ پر پہنچ گئے۔ علاقے کو گھیرے میں لے کر حفاظتی اقدامات کیے گئے تاکہ کسی بھی ممکنہ نقصان سے بچا جا سکے۔ خوش قسمتی سے طیارہ آبادی سے دور گرا، جس کے باعث کسی شہری کے جانی نقصان کی اطلاع موصول نہیں ہوئی۔
بھارتی فضائیہ کے حکام کا کہنا ہے کہ واقعے کی مکمل تحقیقات کے احکامات جاری کر دیے گئے ہیں۔ تکنیکی ماہرین پر مشتمل ٹیم طیارے کے ملبے کا جائزہ لے رہی ہے تاکہ انجن فیل ہونے کی وجوہات اور دیگر تکنیکی پہلوؤں کا تعین کیا جا سکے۔
دفاعی ماہرین کے مطابق حالیہ برسوں میں بھارتی فضائیہ کے طیاروں کو پیش آنے والے حادثات نے دیکھ بھال، تکنیکی معائنہ اور تربیتی نظام پر سوالات اٹھا دیے ہیں۔
