شیخ عمر ادریس کی نمازِ جنازہ دارالحکومت ادیس ابابا کی سب سے بڑی مسجد البنین میں ادا کی گئی، جس میں ہزاروں افراد نے شرکت کی۔ ایتھوپیا کے صدر، وزیراعظم، اعلیٰ حکومتی عہدیداران اور مذہبی رہنماؤں نے بھی جنازے میں شرکت کرکے مرحوم کو خراجِ عقیدت پیش کیا۔

مسیحی برادری نے بھی مفتی اعظم کے انتقال پر گہرے دکھ کا اظہار کیا، چرچز میں خصوصی دعائیہ تقاریب منعقد کی گئیں، جبکہ مسیحی مذہبی رہنماؤں نے انہیں ملک میں اتحاد، رواداری اور مذہبی ہم آہنگی کی علامت قرار دیا۔

شیخ عمر ادریس کو پورے سرکاری اعزاز کے ساتھ سپردِ خاک کیا گیا، ان کے جنازے کا جلوس سرکاری پروٹوکول کے ساتھ نکالا گیا جس میں مختلف مکاتبِ فکر کے افراد نے شرکت کی۔

یہ بھی پڑھیں:ممتاز بزرگ عالمِ دین مولانا حافظ پیر شبیر احمد انتقال کرگئے

شیخ عمر ادریس ایتھوپیا کی پہلی اسلامی فتویٰ کونسل کے بانی اور اسلامک معاہد و مدارس کے سربراہ تھے، انہوں نے اپنی پوری زندگی اسلام کی خدمت اور مذہبی تعلیم کے فروغ کیلئے وقف کر رکھی تھی۔

وہ امہری زبان میں 50 سے زائد کتب کے مصنف تھے اور انہوں نے قرآنِ کریم کا امہری زبان میں ترجمہ بھی کیا، انہوں نے اپنی زندگی میں 300 سے زائد مرتبہ قرآنِ کریم باترجمہ پڑھایا۔

وزیراعظم ابی احمد نے مفتی اعظم کے اہلِ خانہ سے تعزیت کرتے ہوئے کہا کہ شیخ عمر ادریس نے ملک میں اتحاد اور رواداری کی ایسی مثال قائم کی جو آنے والی نسلوں کے لیے مشعلِ راہ رہے گی۔