نادرا کی جانب سے جاری اعلامیے میں کہا گیا ہے کہ جن شہریوں نے اپنی شادی رجسٹرڈ کروالی ہے، وہ یونین کونسل سے کمپیوٹرائزڈ میرج سرٹیفکیٹ حاصل کرنے کے بعد نادرا میں لازمی طور پر اپنی ازدواجی حیثیت اپ ڈیٹ کروائیں۔ اس عمل سے نادرا میں خاندان کی درست تشکیل اور ریکارڈ کی شفافیت برقرار رکھی جا سکے گی۔

یہ بھی پڑھیں:پنجاب میں اساتذہ کو بڑا ریلیف دینے پر غور

اعلامیے کے مطابق، ازدواجی حیثیت اپ ڈیٹ کروانے کے بعد شادی شدہ جوڑے بچوں کے ب فارم (Child Registration Certificate) اور شناختی کارڈ بنواتے وقت کسی بھی قسم کی رکاوٹ یا تکنیکی تاخیر سے بچ سکیں گے۔ اس کے علاوہ، ازدواجی حیثیت درست ہونے کی صورت میں پاسپورٹ بنوانے کے عمل میں بھی آسانی پیدا ہوگی کیونکہ نادرا کا ریکارڈ وزارت داخلہ کے سسٹم سے منسلک ہوتا ہے، اور دونوں ریکارڈز میں مماثلت قانونی تصدیق کے لیے ضروری ہوتی ہے۔
نادرا کے مطابق درست ازدواجی حیثیت اپ ڈیٹ ہونے کی صورت میں شہری فیملی رجسٹریشن سرٹیفکیٹ (FRC) ، جانشینی سرٹیفکیٹ (Succession Certificate) اور دیگر فیملی سے متعلقہ سرکاری دستاویزات بھی با آسانی حاصل کر سکیں گے۔ ان دستاویزات کی درستگی مستقبل میں جائیداد، وراثت اور بینک اکاؤنٹس کے معاملات میں قانونی پیچیدگیوں سے بچنے کے لیے نہایت اہم ہے۔
نادرا نے یہ بھی واضح کیا ہے کہ شہری اپنی ازدواجی حیثیت اپ ڈیٹ کرانے کے لیے نادرا کے کسی بھی قریبی دفتر سے رجوع کر سکتے ہیں یا پاک آئی ڈی (Pak ID) موبائل ایپ کے ذریعے آن لائن درخواست جمع کرا سکتے ہیں۔ آن لائن سہولت کے ذریعے شہری گھر بیٹھے اپنی ازدواجی حیثیت میں تبدیلی کے لیے دستاویزات اپ لوڈ کر کے تصدیق کا عمل مکمل کر سکتے ہیں۔
نادرا حکام نے کہا ہے کہ ازدواجی حیثیت اپ ڈیٹ نہ کرانے سے شہریوں کو مستقبل میں مشکلات کا سامنا ہو سکتا ہے، خصوصاً بچوں کے سرکاری ریکارڈ، جائیداد کی تقسیم، یا بیرونِ ملک ویزا اور سفارتی معاملات میں۔ اس لیے نادرا کی اپیل ہے کہ تمام شادی شدہ افراد اپنے ریکارڈ کو بروقت اپ ڈیٹ کر کے اپنی فیملی رجسٹری کو درست اور محفوظ بنائیں۔