عمان کی وزارتِ دفاع اور وزارتِ محنت نے مشترکہ طور پر اعلان کیا ہے کہ رائل آرمی آف عمان میں سال 2025 کیلئے نئی بھرتی مہم کا آغاز کر دیا گیا ہے، جس کے تحت ملک بھر سے اہل نوجوانوں کو فوج میں شمولیت کا موقع فراہم کیا جا رہا ہے۔

تفصیلات کے مطابق یہ بھرتی مہم اُن مرد و خواتین کیلئے ایک شاندار موقع ہے جو سلطنتِ عمان کی خدمت کا جذبہ رکھتے ہیں اور اپنی صلاحیتوں کو فوجی تربیت اور پیشہ ورانہ خدمات میں استعمال کرنا چاہتے ہیں۔

حکام کے مطابق امیدواروں کے پاس جنرل ایجوکیشن ڈپلومہ (بارہویں جماعت) کی سند ہونا لازمی قرار دی گئی ہے تاکہ وہ بھرتی کے اہلیت معیار پر پورا اتر سکیں۔

درخواست جمع کرانے کا عمل ہفتہ 4 اکتوبر 2025 سے شروع ہو چکا ہے، جو ہفتہ 11 اکتوبر 2025 تک جاری رہے گا۔ امیدوار اپنی درخواستیں آسانی کے ساتھ ایس ایم ایس کے ذریعے جمع کرا سکتے ہیں۔ طریقہ کار کے مطابق درخواست گزار اپنے پیغام میں اپرچونیٹی نمبر سول آئی ڈی نمبر (AT) لکھ کر نمبر 80057 پر ارسال کریں۔

عمان کی فوجی بھرتی مہم میں نیو سولجر کے عہدے کیلئے مرد و خواتین دونوں کیلئے مواقع موجود ہیں، جبکہ موسیقار (Musician) کے عہدے صرف مرد امیدواروں کیلئے مخصوص کیے گئے ہیں۔ ہر عہدے کیلئے مخصوص شرائط و ضوابط طے کیے گئے ہیں جنہیں امیدواروں کو لازمی طور پر پورا کرنا ہوگا۔