حوثی صدارت کی جانب سے جاری بیان میں کہا گیا ہے کہ حملے میں جان دینے والے وزراء اور رہنماؤں کا خون ان کی جدوجہد کو مزید تقویت دے گا۔

قیادت نے واضح کیا کہ حکومت اور ریاستی ادارے کسی صورت اپنا کام بند نہیں کریں گے، بلکہ ہر حال میں اپنے فرائض انجام دیتے رہیں گے۔

حوثی قیادت نے اس موقع پر فلسطین اور خصوصاً غزہ کے عوام کے ساتھ یکجہتی کے عزم کا اعادہ کیا۔

ان کا کہنا تھا کہ اسرائیلی حملے سے ان کے حوصلے پست نہیں ہوں گے، بلکہ وہ اپنی افواج کو مزید مضبوط کریں گے تاکہ جارحیت کا مقابلہ کر سکیں۔

اس سانحے کے بعد یمن میں شدید کشیدگی اور غیر یقینی صورتحال پیدا ہو گئی ہے۔

دوسری جانب ماہرِ بین الاقوامی امور کا کہنا ہے کہ اس حملے کے بعد خطے میں کشیدگی مزید بڑھنے کا خدشہ ہے، کیونکہ حوثی گروہ نے اسرائیل کے خلاف جوابی کارروائی کا عندیہ دیا ہے۔ اگر ایسا ہوا تو خطے میں جنگ کے شعلے مزید بھڑک سکتے ہیں جس کے اثرات نہ صرف یمن بلکہ مشرق وسطیٰ کے دیگر ممالک پر بھی پڑ سکتے ہیں۔