پولش ایف-16 فضائی مظاہرے کی ریہرسل کے دوران گر کر تباہ، ویڈیو وائرل
F-16 crash
فائیل فوٹو
(ویب ڈیسک): پولینڈ میں فضائی مظاہرے کی ریہرسل کے دوران ایک پولش ایف-16 لڑاکا طیارہ تباہ، جس کے نتیجے میں پائلٹ جاں بحق ہو گیا۔

میڈیا رپورٹس کے مطابق، واقعے کی ویڈیو چند منٹوں میں سوشل میڈیا پر وائرل ہو گئی۔ ویڈیو میں دیکھا جا سکتا ہے کہ طیارہ بیریل رول (Barrel Roll) کے دوران اچانک کنٹرول کھو بیٹھا اور زمین سے ٹکرا گیا۔

یہ حادثہ ریڈوم شہر میں پیش آیا جہاں فضائی مظاہرہ منعقد ہونے جا رہا تھا۔

چند ہی لمحوں میں طیارہ ایک زور دار دھماکے سے آگ کے گولے میں تبدیل ہو گیا اور رن وے پر کئی میٹر تک گھسٹتا چلا گیا یہاں تک کہ مکمل طور پر آگ کی لپیٹ میں آ گیا۔

پولش حکومتی حکام نے حادثے کی تصدیق کرتے ہوئے کہا کہ طیارہ ایک مشق کے دوران گر کر تباہ ہوا۔ حکام کا کہنا ہے کہ یہ فضائیہ کے لیے ایک بہت بڑا نقصان ہے اور ہم پائلٹ کی موت پر گہرے رنج و غم میں مبتلا ہیں۔

پولش مسلح افواج کی جنرل کمانڈ نے بتایا کہ یہ طیارہ پوزنان شہر کے شمال میں واقع 31ویں ٹیکٹیکل ایئر بیس سے منسلک تھا۔ خوش قسمتی سے حادثے میں کوئی تماشائی یا شہری زخمی نہیں ہوا۔

یہ بھی پڑھیں: متحدہ عرب امارات: عید میلاد النبی ﷺ پر عام تعطیل کا اعلان

حادثے کے بعد حکام نے مجوزہ فضائی مظاہرہ فوری طور پر منسوخ کر دیا اور حادثے کی تحقیقات شروع کر دی گئیں ہیں۔ حکام کا کہنا ہے کہ حادثے کی اصل وجہ جاننے میں ابھی وقت لگے گا۔

واضح رہے کہ یہ حادثہ ایسے وقت میں پیش آیا ہے جب چند دن قبل ہی ایک امریکی ایف-16 لڑاکا طیارہ جنوبی کوریا کے ساحل کے قریب سمندر میں گر کر تباہ ہوا تھا۔ تاہم اس واقعے میں پائلٹ بحفاظت نکلنے میں کامیاب ہو گیا تھا۔