چینی وزیرِ خارجہ وانگ ای کی فیلڈ مارشل سید عاصم منیر سے اہم ملاقات پر چین کی وزارت خارجہ کی جانب سے جاری ایک بیان کے مطابق وانگ ای کا کہنا تھا کہ پاکستانی فوج نے ہمیشہ دونوں ممالک کی قیادت کے درمیان طے پانے والے اہم اتفاقِ رائے پر عمل درآمد کی بھرپور حمایت کی ہے۔
انہوں نے کہا کہ دنیا میں پیدا ہوتے ہوئے غیر یقینی حالات میں مضبوط پاک چین تعلقات کو فروغ دینا علاقائی امن و استحکام کے لیے نہایت سودمند ہے، چین نے ہمیشہ اپنی پڑوسی سفارت کاری میں پاکستان کو اولین ترجیح دی ہے۔
وانگ ای کا کہنا تھا کہ وقت کے کڑے امتحانات کے باوجود پاک چین تعلقات مزید مضبوط ہوئے ہیں، دونوں ممالک ایک مضبوط روایتی دوستی قائم کر چکے ہیں، چین پاکستان کی علاقائی سالمیت اور قومی سلامتی کے تحفظ میں بھرپور تعاون جاری رکھے گا۔
انہوں نے مزید کہا کہ چین عالمی امور میں پاکستان کے بڑے کردار کا خیرمقدم کرتا ہے۔
یہ بھی پڑھیں: سرکاری اہلکار پر تشدد کا معاملہ، سعید غنی کا بھائی گرفتار
چینی وزارت خارجہ کے مطابق فیلڈ مارشل سید عاصم منیر نے ملاقات کے دوران کہا کہ چین پاکستان کا "آہنی دوست" ہے اور دونوں ممالک ہمیشہ ایک دوسرے کے دکھ سکھ میں شریک رہے ہیں،پاک چین اسٹریٹجک شراکت داری چٹان کی طرح مضبوط ہے۔
فیلڈ مارشل عاصم منیر کا کہنا تھا کہ چین کے ساتھ دوستانہ تعلقات قائم رکھنا پوری پاکستانی قوم کا متفقہ مؤقف ہے، پاکستانی فوج انسداد دہشت گردی اور سکیورٹی تعاون کو فعال طور پر فروغ دینے کے لیے تیار ہے۔
سید عاصم منیر نے مزید کہا کہ پاکستان میں چینی اہلکاروں، منصوبوں اور اداروں کی حفاظت یقینی بنانے کی کوشش جاری رہے گی، پاک چین دوستی کو مزید مستحکم بنانے کے لیے اقدامات اور ترقی کی راہ پر سفر جاری رکھا جائے گا۔
چینی وزارت خارجہ کے مطابق فیلڈ مارشل سید عاصم منیر نے پاکستان کی معاشی اور سماجی ترقی میں قیمتی تعاون پر چین کی قیادت سے اظہارِ بھی تشکر کیا۔
