رپورٹ کے مطابق امریکی صدر ڈونلڈ ٹرمپ نے ٹک ٹاک پر پابندی عائد کرنے کی مدت میں توسیع کے حکم نامے پر دستخط کر دیئے۔

واضح رہے کہ امریکی صدر ڈونلڈ ٹرمپ نے تیسری بار ٹک ٹاک پر پابندی میں توسیع کے ایگزیکٹو آرڈر پر دستخط کئے ہیں، اس حکم نامے کے بعد ٹِک ٹاک کو امریکی خریدار کو بیچنے کیلئے 90 روز کی رعایت مل گئی ہے۔

صدر ٹرمپ کا کہنا ہے کہ ٹِک ٹاک کو 17ستمبر تک فروخت کرنے کا وقت دے دیا ہے، امید ہے صدر شی جن پنگ ٹِک ٹاک کی فروخت کی اجازت دے دیں گے۔

خیال رہے کہ سابق امریکی حکومت نے قومی سلامتی کیلئے خطرہ قرار دیتے ہوئے ٹک ٹاک کو کسی امریکی کمپنی کو فروخت کا قانون بنایا تھا۔

قانون کے مطابق ٹک ٹاک کو 19 جنوری تک کسی امریکی کمپنی کے ہاتھوں فروخت کیا جانا تھا تاہم 20 جنوری کو صدر ٹرمپ نے عہدہ سنبھالنے کے بعد ٹک ٹاک پر پابندی کے وقت میں 75 روز کی توسیع کے حکمنامے پر دستخط کیے تھے۔

وائٹ ہاؤس کی پریس سیکرٹری کیرولین لیویٹ نے کہا ہے کہ صدر ٹرمپ ٹک ٹاک کو آپریشنل رکھنے کے لیے پرعزم ہیں، صدر ٹرمپ کئی بار کہہ چکے ہیں کہ وہ ٹک ٹاک کو بند نہیں کرنا چاہتے۔