بھارتی پروازوں کے لئے پاکستانی فضائی حدود کی بندش کا آج 22واں روز ہے، پاکستانی فضائی حدود کی بندش کے دوران 2300 سے زائد بھارتی پروازیں متاثر ہوئی ہیں جبکہ بھارتی ایئرلائنز کو صرف گزشتہ 18 روز میں 460 کروڑ بھارتی روپے سے زائد کا جھٹکا لگا ہے۔

بھارت کی ایئر انڈیا، آکاسا ایئر، اسپائس جیٹ، اندیگو ایئر، ایئر انڈیا ایکسپریس کی پروازیں متاثر ہورہی ہیں،پاکستان کی فضائی حدود کی بندش سے بھارتی طیاروں کو تاحال آدھے بھارت سے ہوکر بحیرہ عرب سے جانا پڑ رہا ہے۔

بھارتی ایئرلائنز کو لمبے روٹس سے گزرنے پر فیول اور دیگر آپریشنل اخراجات دگنے ہونے پر اب تک کروڑوں کا نقصان ہو چکا ہے جبکہ اندیگو ایئر کا تاشقند اور الماتی کے لیے فلائٹ آپریشن تاحال بند ہے، دہلی امرتسر، ممبئی، احمد آباد بنگلور سمیت دیگر بھارتی شہروں سے جانے والی بھارتی ایئرلائنز کو شدید نقصان ہوچکا ہو چکا ہے۔

ذرائع کا بتانا ہے کہ دہلی سے امریکا ، یورپ اوربرطانیہ کی بھارتی ایئرلائنز کی پروازوں کو نقصان کا سامنا ہے، بھارتی مسافر دیگر ایئرلائنز میں سفر کرنے کو ترجیح دینے لگے ہیں، لمبے روٹ کی پروازوں کے بھارتی ایئرلائنز عملہ کو یورپ میں تبدیل کرنا پڑ رہا ہے۔

دگنے فیول اور لینڈنگ سے بھارتی ایئرلائنز کو ایئرپورٹ چارجز کی مد میں بھی یومیہ کروڑوں کی ادائیگی سے بڑا نقصان ہو رہا ہے،پروازوں کی منسوخی سے بھارتی مسافروں کو ایئر انڈیا، انڈیگو ایئر ، اکاسا ایئر ، انڈیا ایکسپریس، اسپائس جیٹ سمیت دیگر ایرلائنز سے ریفنڈز بھی نہ مل سکے۔

خیال رہے کہ پاکستان نے ابتدائی طور 23 اپریل سے 23 مئی تک ایک ماہ تک کے لیے بھارتی طیاروں کے لیے اپنی فضائی حدود بند کرنے کا فیصلہ کیا تھا،2019 میں بھی پاکستان کی فضائی حدود بندش سے بھارتی ایئرلائنز کو 700 کروڑ بھارتی روپے کا جھٹکا لگا تھا۔