4:52_ آپریشن بُنْيَانٌ مَّرْصُوْصٌ

سیکیورٹی ذرائع کے مطابق اس آپریشن کے تحت بھارتی فوجی تنصیبات کو کامیابی کے ساتھ نشانہ بنایا گیا ہے، جن میں سب سے اہم بیاس کے علاقے میں واقع براہموس میزائل کی سٹوریج سائٹ، ایئر بیس ادھم پور اور پٹھان کوٹ کا ایئر فیلڈ شامل ہیں۔

بیاس کی وہ اسٹوریج سائٹ جہاں سے پاکستان پر میزائل داغے گئے تھے، مکمل طور پر تباہ کر دی گئی ہے۔ اس مقام کو انتہائی درستگی کے ساتھ نشانہ بنایا گیا تاکہ دشمن کو اس کی جارحیت کا بھرپور اور واضح پیغام دیا جا سکے۔

ادھم پور ایئر بیس، جو بھارتی فضائیہ کا ایک اہم اڈہ سمجھا جاتا ہے، بھی شدید بمباری کا نشانہ بنا اور وہاں سے دشمن کی کارروائی کی صلاحیت مکمل طور پر مفلوج ہو چکی ہے۔

اسی طرح، پٹھان کوٹ میں واقع ایئر فیلڈ کو بھی نشانہ بنایا گیا، جہاں کئی بھارتی لڑاکا طیارے اور ڈرون تعینات تھے۔ ابتدائی اطلاعات کے مطابق، وہاں شدید دھماکوں کی آوازیں سنی گئیں اور متعدد طیارے زمین بوس ہو گئے۔

اس وقت بھی پاک افواج کی جوابی کارروائی جاری ہے اور بھارت میں کئی دیگر اہداف کو نشانے پر رکھا گیا ہے۔ پاکستان نے یہ کارروائی نہ صرف اپنے دفاع کے تحت کی ہے بلکہ یہ واضح پیغام بھی دیا ہے کہ کسی بھی جارحیت کا منہ توڑ جواب دیا جائے گا۔ عوامی سطح پر بھی اس آپریشن کی مکمل حمایت کی جا رہی ہے۔

5:41_ پاکستان کی بھارت کو وارننگ

پاکستانی جواب میں بھارت کی مزید کارروائی پر پاکستان کی سیاسی و عسکری قیادت نے دوٹوک ردعمل دے دیا۔ بھارت نے مزید جارحیت کی تو ہائی ویلیو اہداف کونشانہ بنایا جائے گا۔ جوابی حملے کی صورت میں بھارت کے معاشی اہداف بھی نشانے پر ہوں گے۔ پاکستان کی سیاسی و عسکری قیادت نے سخت انتباہ کیا کہ بھارت نے حرکت کی تو نتائج سنگین ہوں گے۔

6:17_ بھارتی آرٹلری گن پوزیشن دہرنگیاری تباہ

پاکستان نے براہموس سٹوریج سائٹ نگروٹا کو بھی تباہ کر دیا گیا، بھاری نقصانات کی اطلاعات ہیں۔ آپریشن میں متعدد ٹارگٹ کو نشانہ بنایا جا رہا ہے۔ دشمن کے بھاری نقصان کی اطلاعات ہیں۔

6:30_ سائبر آپریشن

سائبر آپریشن کے دوران درج ذیل اہداف کو نشانہ بنایا گیا۔ 10 انرجی  سیکٹرز کو تباہ کر دیا گیا۔ 1744 ویب سروس کا ڈیٹا بھی تباہ کر دیا گیا۔ ونڈ ملز اور انرجی صارفین کا ڈیٹا بھی اڑا دیا۔ بھارتی ریلوے اور گیس کا ڈیٹا بھی ڈیلیٹ ہوگیا۔ 507 انفارمیشن ٹیکنالوجی بیس تباہ ہوگئیں۔ 15 میل سرور بھی تباہ ہوگئے۔

اسی سائبر حملے میں 13 گورنمنٹ پورٹل بھی تبدیل ہوگئے۔ 150 ڈیٹا پورٹل تباہ اور ڈیٹا لیک کر دیا گیا۔ بی جے پی مدھیا پردیش کی ویب سائیٹ ہیک ہوگئی۔ 110 کارپوریٹ سیکٹرز کی ویب سائیٹ کو نقصان ہوا۔

6:35_پاکستانی ڈرونز دہلی پہنچ گئے

پاکستانی ڈرونز دہلی پہنچ گئے جہاں پر ان کی پروازیں جاری ہیں۔

6:52_باچا خان انٹر نیشنل ائر پورٹ

پاک بھارت گشیدگی کے بعد باچا خان انٹر نیشنل ائر پورٹ پر فلائٹ آپریشن روک دیا گیا۔ یہ پروازیں دن 12 بجے تک ملتوی کی گئیں ہیں۔

سول ایوی ایشن حکام نے سنو نیوز سے گفتگو کرتے ہوئے کہا کہ شارجہ، دبئی اور ریاض کو جانے والی پروازیں ملتوی کر دی گئیں، پی آئی اے، عربیہ اور دیگر پروازیں ملتوی کر دی گئیں ہیں، عربیہ کی 7 بجکر 10 منٹ پر جانے والی پرواز ملتوی کی۔ پی آئی اے کی 7 بجکر 50 منٹ پر دوبئی جانے والی پرواز ملتوی ہوگئی۔

نجی ائیر لائن کی ریاض کےلیے دوپہر 2 بجکر 50 منٹ پر جانے والی پرواز بھی ملتوی کر دی گئی۔ کسی بھی ہنگامی صورت حال کے لیے باچا خان انٹر نیشنل ائر پورٹ کو کھلا ہے۔

7:10_نیشنل کمانڈ اتھارٹی کا اجلاس

وزیراعظم شہباز شریف نے نیشنل کمانڈ اتھارٹی کا اجلاس طلب کرلیا۔ نیشنل کمانڈ اتھارٹی نیوکلیئر اور میزائل پالیسی سے متعلق امور پر فیصلہ سازی کا اختیار رکھتی ہے۔ نیشنل کمانڈ اتھارٹی کا قیام فروری 2000 میں قومی سیکیوریٹی کونسل کی جانب سے لایا گیا۔ نیشنل کمانڈ اتھارٹی اجلاس کی صدارت وزیراعظم شہباز شریف کریں گے۔ نیشنل کمانڈ اتھارٹی اجلاس میں اعلی سول اور عسکری حکام شرکت کریں گے۔ وفاقی وزراء برائے خارجہ، دفاع، داخلہ اور خزانہ بھی اتھارٹی کا حصہ ہیں۔

7:20_بھارت کا S-400 سسٹم تباہ

پاکستان ائیر فورس کے جے ایف 17 تھنڈر کے ہائپر سونک میزائلوں نے آدم پور میں بھارت کا S-400 سسٹم تباہ کر دیا۔ S -400 ائیر ڈیفنس سسٹم کی مالیت لگ بھگ 1.5 بلین ڈالر ہے۔

7:30_بھارتی ویب سائیٹس ہیک

پاکستان نے جوابی کارروائی کرتے ہوئے بیشتر بھارتی ویب سائیٹس ہیک کر لیں۔ پاکستانی سائبر حملے میں بیشتر بھارتی ویب سائٹس کو ہیک کر لیا گیا۔ بی جے پی کی آفیشل ویب سائٹ کو ہیک کر لیا گیا۔

ہیک کی گئی ویب سائٹس میں کرائم ریسرچ انویسٹگیشن ایجنسی، ماہا نگر ٹیلی کمیونیکیشن کمپنی لمیٹڈ، بھارت ارتھ موورز لمیٹڈ، آل انڈیا نیول ٹیکنیکل سپروائزری سٹاف ایسوسی ایشن شامل ہیں۔ ہیک کی گئی سائٹس کا مکمل مواد اڑا دیا گیا ہے۔

ہیک کی گئی مزید ویب سائٹس میں ہندوستان ایروناٹکس لمیٹڈ، بارڈر سیکورٹی فورسز، یونیک آڈنٹیفیکش اتھارٹی آف انڈیا کا ڈیٹا لیک کر دیا ہے۔ ڈیٹا لیک سائٹس میں انڈین ائیر فورس، مہاراشٹر الیکشن کمیشن اور دیگر شامل ہیں۔ اسکے علاوہ 2500 سے زائد سرویلنس کیمرے بھی ہیک کر لئے گئے ہیں۔

07:45_بھارتی خاتون پائلٹ گرفتار

پاکستان نے بھارتی خاتون پائلٹ سکواڈرن لیڈر شیوانگی سنگھ کو گرفتار کرلیا۔ خاتون بھارتی پائلٹ رافیل طیارہ اڑا رہی تھی۔

8:30_ امریکی وزیر خارجہ کا آرمی چیف سے رابطہ

پاک بھارت حالیہ کشیدہ صورتحال پر عالمی ردعمل سامنے آنے لگا ہے۔ امریکی وزیر خارجہ مارکو ربیو نے آرمی چیف جنرل سید عاصم منیر سے ٹیلی فونک رابطہ کیا ہے جس میں خطے کی تازہ صورتحال پر تبادلہ خیال کیا گیا۔

ذرائع کے مطابق اس رابطے میں امریکی وزیر خارجہ نے پاکستان اور بھارت کے درمیان بڑھتی ہوئی کشیدگی پر گہری تشویش کا اظہار کیا اور فریقین سے تحمل اور بردباری اختیار کرنے کی اپیل کی۔ مارکو ربیو نے کہا کہ امریکہ اس وقت سفارتی ذرائع سے کشیدگی کم کرنے کے لیے ہر ممکن تعاون کے لیے تیار ہے، اور وہ نہیں چاہتا کہ یہ صورتحال کسی بڑے فوجی تصادم میں تبدیل ہو۔

08:45_ امریکی وزیر خارجہ اور اسحاق ڈار رابطہ

دوسری جانب امریکی وزیر خارجہ مارکو ربیو نے پاکستان کے نائب وزیراعظم اسحاق ڈار سے بھی ٹیلی فون پر رابطہ کیا۔ اس گفتگو میں بھی خطے کی موجودہ صورتحال اور ممکنہ خطرات پر تبادلہ خیال ہوا۔

مارکو ربیو نے اسحاق ڈار کو بتایا کہ امریکہ اس بات کا خواہاں ہے کہ خطے میں امن و استحکام قائم رہے، اور اس کے لیے امریکہ سفارتی کوششیں جاری رکھے گا۔

9:12_ پاکستانی پائلٹس کی وصیت

بھارت کے خلاف مؤثر اور ہدف شکن فضائی کارروائی کرنے والے پاکستانی پائلٹس کی تصاویر سامنے آگئی ہیں جنہوں نے دشمن کے ایئربیسز کو تباہ کر کے تاریخ رقم کر دی۔

یہ وہ لمحہ تھا جب وطن کی فضاؤں کے محافظ، شہادت کی پرواز کے لیے اپنی جانوں کا نذرانہ پیش کرنے نکلے۔ ان کے چہروں پر نہ کوئی ہچکچاہٹ تھی، نہ خوف، صرف ایمان، حوصلہ اور وطن سے وفا کی جھلک تھی۔

ذرائع کے مطابق ان بہادر پائلٹس نے اپنے مشن سے قبل اپنے ہاتھوں سے وصیت نامے پر دستخط کیے۔ ہر ایک نے اپنے رب سے دعا کی: "یا اللہ، وطن کی عزت سلامت رکھنا، اگر ہم واپس نہ آئیں تو ہماری لاشیں پرچم میں لپٹی ہوں۔" ان کا عزم اور جذبہ قربانی اس قوم کے لیے فخر کی علامت ہے۔

اللہ تعالیٰ کی مدد شامل حال رہی، اور پاک فضائیہ کے یہ شیر دل سپاہی کامیابی سے دشمن کی سرزمین پر حملہ کر کے واپس لوٹ آئے۔ انہوں نے بھارت کے پٹھان کوٹ، بھٹنڈہ اور سسرام ایئربیسز کو نشانہ بنایا، جہاں دشمن کی بڑی تعداد میں دفاعی تنصیبات موجود تھیں۔ ان حملوں کے نتیجے میں دشمن کے متعدد جنگی طیارے، ڈرون اور میزائل سسٹمز تباہ ہو گئے۔

پاک فضائیہ کے ان پائلٹس کی تصاویر جب منظر عام پر آئیں تو قوم میں خوشی، فخر اور جذبات کا ایک نیا طوفان برپا ہو گیا۔ ہر شہری نے اپنے محافظوں کو سلام پیش کیا، جنہوں نے نہ صرف دشمن کو منہ توڑ جواب دیا بلکہ اپنے وطن کے دفاع کا فرض پوری ذمہ داری سے ادا کیا۔

یہ صرف جنگی کامیابی نہیں، بلکہ جذبہ ایمانی، پیشہ ورانہ مہارت اور وطن سے بے پناہ محبت کی ایک زندہ مثال ہے۔ پاکستانی پائلٹس نے ثابت کر دیا کہ وہ مرنے کے بعد بھی زندہ رہتے ہیں، اور دشمن کی جارحیت کو کبھی کامیاب نہیں ہونے دیتے۔

10:06_ بھارت میں ایئر پورٹس بند

بھارت نے اپنے 32 ایئرپورٹس کو 15 مئی تک بند کر دیا۔ ممبئی اور دہلی کی ایئر اسپیس کے 25 روٹس کو بھی 15 مئی تک کمرشل پروازوں کے لیے بند کردیا گیا۔

ادھمپور، امبالا، امرتسر، اوانتی پور بھوج ایرپورٹس پر 15 مئی تک تمام فلائٹ آپریشن کے لیے بند کر دیا۔ بھٹنڈا، بیکانیر، چندیگڑھ، ہلواڑا ایرپورٹس کو بھی بھارت نے 15 مئی تک کمرشل پروازوں کے لیے بند کیا ہے۔ ہندن، جامن گڑھ، جیسلمیر، جودھپور، کانڈلا ایرپورٹس بھی 15 مئی تک بند کر دیا۔

کانگرا، کیشوڑ، کشن گڑھ ایرپورٹس کو بھی 15 مئی تک ہر قسم کی کمرشل پروازوں کے لیے بھارت نے بند کیا ہے۔ بھونتار، لدھیانہ، لیہہ، مندرا ایرپورٹس بھی بھارت نے بند کر دیئے۔ نلیہ، پٹھان کوٹ، پوربندر، راجکوٹ ایئرپورٹس کو بھی بند کر دیا گیا۔ شملہ، سری نگر، سر ساوا، تھیوس، اترلائی ایئرپورٹس بھی بھارت نے تمام کمرشل پروازوں کے لئے 15 مئی تک بند کر دیئے۔ تمام بھارتی ایرلائنز اور غیر ملکی ایرلاینز کو 15 مئی تک پروازوں کو منسوخ کرنے کی ہدایت کردی گئی۔

10:35_ ترجمان بھارتی فوج

ترجمان بھارتی فورج صوفیا قریشی نے اودھم پور، پٹھان کوٹ، بٹھنڈا اور آدم پور پر پاکستانی حملے سے ہونے والے نقصان کی تصدیق کر دی۔ انہوں نے کہا کہ پاکستان نے سری نگر، آونتی پور میں بھارتی فوجی ٹھکانوں پر حملہ کیا، ہم کشیدگی اور تناؤ بڑھانا نہیں چاہتے، بشرطیکہ پاکستان بھی ایسا کرے۔

10:53_ خواجہ آصف

وفاقی وزیر خواجہ آصف نے کہا ہے کہ گجرات سے پنجاب تک بھارتی ایئر فیلڈز تباہ کر دی، پاکستان کے پاس اور کوئی آپشن نہیں رہ گیا تھا، بھارت کو ایسا جواب دیا کہ تین چار دن کاقرض پورا ہوگیا، عوام بھی چاہتے تھے کہ ہم بھارت کوجواب دیں، بھارت پر کاری ضرب لگائی ہے۔

خواجہ آصف کا کہنا تھا کہ ہماری افواج نے جو جواب دیا کمال کر دیا ہے، بھارت نے چند روز سے تماشہ لگا رکھا تھا، جواب تو آنا تھا، پہلگام واقعہ کی تحقیقات سے مودی انکاری ہے، ہم نہیں بھارت کو جو ضربیں لگی ہیں وہ اس کو اب ٹکور کر رہا ہے، نیشنل کمانڈاتھارٹی کی ابھی کوئی میٹنگ نہیں ہے، افواج پاکستان کے تمام اثاثے محفوظ ہیں۔

11:00_ اسحاق ڈار

نائب وزیراعظم اسحاق ڈار نے کہا ہے کہ بھارت کے 80 ڈرونز گرائے جاچکے ہیں، بھارت نے پاکستان کے پاس کوئی چوائس نہیں چھوڑی تھی، بھارتی جارحیت میں اب تک 35 افراد شہید ہوچکے ہیں، ابھی ہم بھارت کو رات کیے گئے حملوں کے جواب دے رہے ہیں، پاکستان جو کر رہا ہے اپنے دفاع میں کر رہا ہے۔

اسحاق ڈار کا کہنا تھا کہ گزشتہ رات انہوں نے جو کیا وہ ہماری برداشت سے باہر تھا، ہمارے صبر کا پیمانہ لبریز ہوچکا ہے، بھارت نے اب حملہ کیا تو سخت جواب دیا جائے گا، بھارت مزید کارروائی نہیں کرتا تو ہم بھی نہیں کریں گے۔

11:15:وزیراعظم کا سیاسی قیادت سے رابطے کا فیصلہ

وزیراعظم شہباز شریف نے پاکستان پیپلز پارٹی کے چیئرمین بلاول بھٹو زرداری، پی ٹی آئی کے چیئرمین بیرسٹر گوہر، جمیعت علماء اسلام ف کے راہنما مولانا فضل الرحمان، کنوینر متحدہ قومی موومنٹ خالد مقبول صدیقی، امیر جماعت اسلامی حافظ نعیم الرحمن، بلوچستان عوامی پارٹی کے سربراہ خالد حسین مگسی اور پاکستان مسلم لیگ ق کے راہنما چوہدری سالک حسین سے ٹیلیفونک رابطہ کیا۔

اس موقع پر شہباز شریف کہا کہنا تھا کہ الحمدللہ افواج پاکستان نے بھارتی جارحیت کا آج مربوط طریقے سے پر زور اور طاقت ور جواب دیا ہے، بھارت نے پاکستان پر میزائل اور ڈرون حملے کیے، ان جارحانہ اقدامات کے باوجود پاکستان نے انتہائی تحمل سے کام لیا، پہلگام واقعے کے بعد پاکستان نے حقائق جاننے کے لیے غیر جانبدارانہ تحقیقات کا کہا، جس کو بھارت نے ٹھکرا دیا، آج صبح دوبارہ بھارت نے نور خان ایئربیس اور دیگر مقامات پر میزائل سے حملے کیے۔

وزیراعظم نے کہا کہ بھارتی حملوں میں نہتے اور معصوم شہریوں کو نشانہ بنایا گیا، بھارت کی ان پے در پے کاروائیوں کا ہماری بہادر افواج نے بھرپور جواب دیا، پاکستان نے آپریشن بنیان ال مرصوس میں جوابی کارروائی میں بھارت کی ان ملٹری تنصیبات کو خصوصی طور پر نشانہ بنایا جن سے پاکستان پر حملے کیے گئے، آج ہم نے بھارت کو منہ توڑ جواب دیا ہے اور بے گناہوں کے خون کا بدلہ لے لیا ہے، ہمیں اپنی افواج پر فخر ہے۔

انہوں نے آپ سمیت پوری قوم کو میں اس کامیاب آپریشن پر مبارکباد پیش کرتا ہوں، ہم بھارت کی پاکستان کی سالمیت کو نقصان پہنچانے کی مذموم کوششوں کو ناکام بنانے کے لیے پر عزم ہیں۔ ملکی سیاسی راہنماؤں نے پاک فوج کے جوانوں کے تدبر، حوصلے اور پیشہ ورانہ مہارت کو خراج تحسین پیش کیا۔

 ملکی سیاسی راہنماؤں نے وزیراعظم کو مشکل کی اس گھڑی میں اپنے اور پوری پاکستانی قوم کے تعاون اور یکجہتی کا یقین دلایا۔ انہوں نے کہا کہ مادر وطن کے دفاع کے لیے ہماری بہادر افواج کی مہارت قابل تحسین ہے۔ وزیراعظم نے ملکی سیاسی قیادت کا واشگاف الفاظ میں ساتھ دینے پر اظہار تشکر کیا۔