امریکی صدر ڈونلڈ ٹرمپ نے اسرائیلی وزیراعظم بنیامین نیتن یاہو کے ہمراہ وائٹ ہاؤس میں پریس کانفرنس کرتے ہوئے کہا کہ ہم غزہ کو ترقی دیں گے، علاقے کے لوگوں کو ملازمتیں دیں گے اور شہریوں کو بسائیں گے، فلسطینیوں کو منصوبے کے تحت بے خوف جگہ پر بسایا جائے گا، اس کیلئے اردن اور مصر کے رہنما جگہ فراہم کریں گے، اس حوالے سے مشرق وسطیٰ کے دیگر رہنماؤں سے بات ہوئی ہے اور ان رہنماؤں کو فلسطینیوں کو غزہ سے منتقل کرنے کا منصوبہ پسند آیا ہے۔
ڈونلڈ ٹرمپ نے کہا کہ جلد غزہ، اسرائیل اور سعودیہ کا دورہ کروں گا، اس حوالے سے سعودی عرب بہت مدد گار ثابت ہوگا، ہمیں امید ہے جنگ بندی برقرار رہے گی اور بہت سے ممالک جلد ہی ابراہم معاہدے میں شامل ہوں گے، نیتن یاہو سے ملاقات میں حماس کے خاتمے کو یقینی بنانے کے طریقہ کار پر بات ہوئی ہے، میں ایران کے ساتھ ڈیل کرنا پسند کروں گا، اگر لگا کہ ایران ک پاس جوہری ہتھیار ہیں تو یہ ان کی بدقسمتی کا باعث ہوگا۔
دوسری جانب اسرائیلی وزیراعظم نے کہا کہ ٹرمپ غزہ کا مختلف مستقبل دیکھتے ہیں، ان کا منصوبہ تاریخ بدل سکتا ہے، میری اور صدر ٹرمپ کی خواہش ہے کہ ایران کبھی ایٹمی ہتھیار تیار نہ کرے۔
