پرانے آئی فون صارفین کیلئے بڑی خوشخبری
رپورٹس کے مطابق ایپل کی جانب سے مفت سیٹلائٹ سروس کی مدت میں توسیع کا انکشاف نئے آئی فون 18 پرو سے متعلق دستاویزات میں ہوا ہے، اس سہولت کا اطلاق آئی فون 14 سے آئی فون 16 سیریز تک کے معاون ماڈلز پر ہوگا۔
ایپل کے مطابق وہ صارفین جن کے معاون آئی فونز 9 ستمبر 2026 سے پہلے فعال کیے گئے تھے، توسیع شدہ مدت کے دوران بغیر کسی اضافی سبسکرپشن فیس کے سیٹلائٹ سے متعلق ہنگامی سہولیات استعمال کرسکیں گے۔
مفت سیٹلائٹ کنیکٹیویٹی کے تحت صارفین کو ایمرجنسی ایس او ایس، سیٹلائٹ کے ذریعے پیغامات بھیجنے اور فائنڈ مائی کے ذریعے اپنی لوکیشن شیئر یا ٹریک کرنے کی سہولت دستیاب ہوگی۔ اس کے علاوہ سڑک پر گاڑی خراب ہونے کی صورت میں کار سروس سپورٹ بھی حاصل کی جاسکے گی۔
یہ سہولت خاص طور پر ایسے علاقوں میں اہمیت رکھتی ہے جہاں موبائل نیٹ ورک یا وائی فائی دستیاب نہ ہو، ایسے حالات میں صارفین سیٹلائٹ کنیکٹیویٹی کے ذریعے ہنگامی رابطہ برقرار رکھ سکتے ہیں۔
ایپل نے پہلی مرتبہ 2022 میں آئی فون 14 سیریز کے ساتھ سیٹلائٹ کے ذریعے ایمرجنسی ایس او ایس کی سہولت متعارف کرائی تھی، جس کے بعد کمپنی نے مختلف نئے آئی فون ماڈلز میں اس ٹیکنالوجی کو مزید وسعت دی۔
رپورٹس کے مطابق 2026 میں مفت آزمائشی سروس کی مدت میں توسیع آئی فون 14 صارفین کیلئے تیسری، آئی فون 15 کیلئے دوسری جبکہ آئی فون 16 سیریز کیلئے پہلی توسیع ہے۔
یہ بھی پڑھیں:متحدہ عرب امارات نے اسٹارلنک کو سیٹلائٹ انٹرنیٹ سروسز کے لیے 10 سالہ لائسنس دے دیا
تاہم ایپل نے ابھی یہ واضح نہیں کیا کہ توسیع شدہ مفت مدت ختم ہونے کے بعد سیٹلائٹ کنیکٹیویٹی کے لیے صارفین سے کتنی فیس وصول کی جائے گی۔ کمپنی کی ویب سائٹ پر فی الحال اسے محدود مدت کی مفت آزمائشی سہولت قرار دیا گیا ہے۔
