یوٹیوب نے ویوز گننے کا نظام بدل دیا، نئی پالیسی 24 اگست سے نافذ
یوٹیوب کی جانب سے جاری کمیونٹی پوسٹ کے مطابق ماضی میں پلیٹ فارم پر ویو گننے کے لیے مختلف طریقے استعمال کیے جاتے رہے تاہم صارفین کی جانب سے موجودہ نظام کو الجھن کا باعث قرار دیے جانے کے بعد نئی اپ ڈیٹ متعارف کرانے کا فیصلہ کیا گیا ہے۔
نئے طریقہ کار کے تحت جیسے ہی کوئی صارف ویڈیو چلائے گا اس کا ویو شمار ہو جائے گا، یوٹیوب نے اس سے قبل تقریباً ایک سال پہلے شارٹس کیلئے بھی یہی طریقہ اپنایا تھا۔
یہ نظام ٹک ٹاک اور انسٹاگرام کے موجودہ طریقہ کار سے بھی ملتا جلتا ہے جہاں ویڈیو چلنے پر ہی ویو شمار کیا جاتا ہے۔
یہ بھی پڑھیں: یوٹیوب سے کمائی کے خواہشمند ہوشیار، مونیٹائزیشن کی نئی شرائط سامنے آگئیں
کمپنی کے مطابق اس تبدیلی کے بعد ان ویڈیوز کے ویوز میں خاصا اضافہ ہوسکتا ہے جنہیں صارفین مختصر وقت کے لیے دیکھتے ہیں، تاہم یوٹیوب نے واضح کیا ہے کہ پہلے والا ویو کاؤنٹ بھی برقرار رہے گا، جسے انگیجڈ ویوز کہا جائے گا اور اسے کریئیٹرز اینالیٹکس میں دیکھ سکیں گے۔
یوٹیوب کا کہنا ہے کہ نئے ویو کاؤنٹ سے صارفین کی آمدنی یا یوٹیوب پارٹنر پروگرام میں اہلیت متاثر نہیں ہوگی۔
