سابق نیول پائلٹ کمانڈر اور مے ڈےفاؤنڈیشن سکول آف موٹیویشن اور سٹارگیز اے آئی کمپنی کے سربراہ شواز بلوچ نے کہا ہے کہ ان کے ادارے نے قوت گویائی و سماعت سے محروم خصوصی افراد کے لیے بین الاقوامی سطح پر ایک ایپ تیاری کرائی ہے جس سے ایسے افراد باآسانی نارمل افراد سے رابطہ کر سکتے ہیں۔
انہوں نے بتایا کہ خصوصی افراد کی معذوری رابطے میں رکاوٹ نہیں بنے گی اور وہ اپنی با ت باآسانی بتا اور سمجھا سکیں گے، اس حوالے سے ایک ایسا کی بورڈ تیار کیا گیا ہے جو روز مرہ کے معاملات اور رابطے میں معاون ثابت ہو گا، وہ اپنے مسائل اور مافی الضمیر متعلقہ اداروں اور افراد تک پہنچا سکیں گے اور عام شہریوں کی طرح معاشرے کا مفید حصہ بن سکیں گے۔
یہ بھی پڑھیں: پنجاب میں پہلی سولر کار متعارف
اس ایپ کا نام سائن اوور کی بورڈ ہے جو پلے سٹور پر باآسانی اور مفت دستیاب ہے، عالمی سطح پر اسے انقلابی ایجاد قرار دیا جا رہا ہے، جس سے قوت گویائی اور سماعت سے محروم افراد کو زبان اور کان مل جائیں گے، اس ایپ کی مدد سے دنیا بھر سے خصوصی افراد اپنے خیالات دوسروں تک پہنچا سکیں گے۔
شواز بلوچ نے یہ تجویز دی تھی کہ سینیٹ ، قومی اسمبلی اور صوبائی اسمبلیوں میں ریزرو سیٹوں کا کوٹہ مخصوص کیا جائے اور ان پر طے شدہ حکومت قوانین کے مطابق ڈس ایبلٹی ایکٹ 2020 کا عملی نفاذ کیا جائے۔
سابق نیول پائلٹ کمانڈر شواز بلوچ کا کہنا تھا کہ وہ خصوصی افراد کی زندگی آسان بنانے کیلئے جدید سائنسی ایجادات کی کوششیں کرتے رہیں گے۔
