گزشتہ کئی دنوں سے ملک میں انٹرنیٹ سروس کا مسئلہ حل نہیں کیا جا سکا جس کے باعث فیس بک، ٹک ٹاک، انسٹاگرام اور وٹس ایپ سروسز جزوی متاثرہیں اور صارفین کو تصاویر، وائس نوٹ اور ویڈیوز اپ لوڈنگ اور ڈاؤن لوڈنگ میں مشکلات کا سامنا ہے ۔

ترجمان پی ٹی سی ایل کے مطابق جدہ میں سعودی عرب کے قریب سمندر ی انٹرنیٹ کیبلز میں خرابی پیدا ہوئی ہے ، خرابی کے باعث SMW4 اور IMEWE کی بینڈوتھ جزوی طور پر متاثر ہوئی ہے، متبادل بینڈوتھ پرکام جاری ہے۔

پی ٹی سی ایل ترجمان کا کہنا تھا کہ پاکستانی صارفین کو مصروف اوقات میں سروس کے معیار میں معمولی کمی کا سامنا ہو سکتا ہے، ہمارے بین الاقوامی شراکت دار ادارے مسئلے کو ترجیحی بنیادوں پر حل کر رہے ہیں۔

ترجمان نے کہا کہ پی ٹی سی ایل کی مقامی ٹیمیں صارفین پر اثرات کو کم سے کم کرنے کیلئے متبادل بینڈوتھ کا انتظام کر رہی ہیں، ہم صارفین کے صبر و تحمل کے لئے ان کے شکر گزار ہیں۔