میٹ بک فولڈ ایک جدید 18 انچ OLED فولڈ ایبل ڈسپلے کے ساتھ پیش کیا گیا ہے، جو 3.3K  ریزولوشن اور 4:3 اسکرین تناسب فراہم کرتا ہے۔ فولڈ ہونے پر یہ لیپ ٹاپ 13 انچ کی کمپیکٹ شکل اختیار کر لیتا ہے، جو اسے زیادہ پورٹیبل اور یوزر فرینڈلی بناتا ہے۔ اس میں 140 واٹ کی تیز چارجنگ، 8 میگا پکسل کا فرنٹ کیمرا اور 6 طاقتور اسپیکرز شامل کیے گئے ہیں، جو اس لیپ ٹاپ کو آڈیو اور ویڈیو کے لحاظ سے بھی ممتاز بناتے ہیں۔

یہ بھی پڑھیں:گوگل کا بڑا کارنامہ: صرف تحریر سے مکمل ویڈیو تخلیق ممکن

دوسری جانب، میٹ بک پرو کو 14.2 انچ OLED اسکرین کے ساتھ متعارف کرایا گیا ہے، جو 3.1K  ریزولوشن اور 120Hz  ریفریش ریٹ کے ساتھ نہایت عمدہ ڈسپلے تجربہ فراہم کرتا ہے۔ اس کا وزن صرف 970 گرام ہے، جو اسے انتہائی ہلکا اور پورٹیبل بناتا ہے۔ اس میں 70 واٹ آور بیٹری اور 140 واٹ سپر فاسٹ چارجنگ کی سہولت موجود ہے، جو پروفیشنل یوزرز کے لیے ایک بڑی سہولت ہے۔

ہواوے نے ان لیپ ٹاپس میں HarmonyOS 5 شامل کیا ہے، جو 150 سے زائد ایپلیکیشنز کو سپورٹ کرتا ہے۔ ان ایپس میں WPS Office،MateShow  اور دیگر اہم سافٹ ویئرز شامل ہیں، جو پروفیشنل اور تعلیمی دونوں نوعیت کے صارفین کی ضروریات پوری کرتے ہیں۔

میٹ بک فولڈ کی ابتدائی قیمت 23 ہزار 999 یوان (تقریباً 3,328 امریکی ڈالر) جبکہ میٹ بک پرو کی قیمت 7 ہزار 999 یوان سے شروع ہوتی ہے۔ فی الحال یہ دونوں ماڈلز صرف چین میں دستیاب ہیں، جبکہ عالمی سطح پر لانچنگ کی تاریخ کا اعلان تاحال نہیں کیا گیا۔

ہواوے کا یہ قدم امریکی پابندیوں کے بعد ٹیکنالوجی میں خودکفالت کی طرف ایک بڑی پیش رفت سمجھا جا رہا ہے۔ اب دیکھنا یہ ہے کہ کیا ہواوے کے یہ جدید لیپ ٹاپس عالمی مارکیٹ میں ایپل اور مائیکروسافٹ کو حقیقی مسابقت دے سکیں گے یا نہیں۔