وزیر اعلیٰ کے پی کے معاونِ خصوصی شفقت ایاز نے میڈیا سے بات چیت کرتے ہوئے کہا ہے کہ انٹرنیٹ کی کم رفتار کی وجہ سے صوبے میں آئی ٹی کا شعبہ بری طرح سے متاثر ہو رہا ہے۔

انہوں نے کہا کہ انٹرنیٹ کی رفتار کو بہتر بنانے کیلئے حکومت ایلون مسک سمیت دیگر بین الاقوامی شخصیات سے بھی تعاون طلب کرے گی۔ 

شفقت ایاز کا مزید کہنا تھا کہ کے پی میں انٹرنیٹ کی سست رفتاری ایک بڑا مسئلہ بن چکی ہے، مگر اس کی وجوہات کا کسی کو علم نہیں۔

انہوں نے مزید کہا کہ ہماری حکومت اس مسئلے کو سنجیدگی سے لے رہی ہے اور جلد ہی بین الاقوامی سطح پر رابطے کرکے اس کا حل نکالا جائے گا۔ 

واضح رہے کہ ایلون مسک کی کمپنی "اسٹارلنک" سیٹلائٹ انٹرنیٹ فراہم کرنے کے حوالے سے دنیا بھر میں مشہور ہے،خیبرپختونخوا حکومت بھی اس ٹیکنالوجی کے ذریعے انٹرنیٹ کی رفتار میں بہتری لانے کے امکانات کا جائزہ لے رہی ہے۔ 

عوام نے اس حکومتی اقدام کو خوش آئند قرار دیتے ہوئے امید ظاہر کی ہے کہ اس فیصلے سے صوبے میں ڈیجیٹل ترقی کی راہ ہموار ہوگی۔