فیفا ورلڈکپ: ایران ٹورنامنٹ سے باہر ہوگیا
تفصیلات کے مطابق الجزائر اور آسٹریا کے درمیان کھیلا گیا اہم میچ 3-3 گول سے برابر رہا، جس کے بعد دونوں ٹیموں نے گروپ جے سے راونڈ آف 32 کیلئے کوالیفائی کر لیا، اس نتیجے کے بعد ایران کی ٹیم کا سفر ورلڈکپ میں اختتام پذیر ہو گیا۔
میچ کے دوران ابتدا سے ہی سخت مقابلہ دیکھنے میں آیا۔ پہلے 60 منٹ تک دونوں ٹیمیں 2-2 گول سے برابر رہیں۔ بعد ازاں الجزائر نے دوسرے ہاف کے انجری ٹائم میں تیسرا گول کر کے برتری حاصل کی، تاہم میچ کے بالکل آخری لمحات میں آسٹریا نے بھی تیسرا گول داغ کر مقابلہ برابر کر دیا اور ناک آؤٹ مرحلے میں جگہ بنا لی۔
دوسری جانب پرتگال جس کی قیادت اسٹار فٹبالر کرسٹیانو رونالڈو کر رہے ہیں، اپنے آخری گروپ میچ میں کولمبیا کیخلاف کوئی گول نہ کر سکی اور میچ 0-0 سے برابر رہا۔ دونوں ٹیمیں پہلے ہی ناک آؤٹ مرحلے کیلئے کوالیفائی کر چکی تھیں، تاہم کولمبیا نے متعدد حملے کیے مگر گول کرنے میں ناکام رہی۔
ایک اور اہم میچ میں کانگو نے ازبکستان کو 3-1 سے شکست دے کر 52 سال بعد ورلڈکپ میں اپنی پہلی ناک آؤٹ اسٹیج میں جگہ بنا لی، جسے ایک تاریخی کامیابی قرار دیا جا رہا ہے۔
گروپ L میں کروشیا نے گھانا کو 2-1 سے شکست دے کر اگلے مرحلے میں رسائی حاصل کی، جبکہ انگلینڈ نے پاناما کو 2-0 سے ہرا کر گروپ میں پہلی پوزیشن حاصل کر لی۔
یہ بھی پڑھیں:فیفا ورلڈکپ 2026 میں جرمنی کو اپ سیٹ شکست
ورلڈکپ کے گروپ مرحلے کے میچز آج مکمل ہو جائیں گے، جبکہ ناک آؤٹ راؤنڈ کا آغاز کل سے متوقع ہے، جہاں مقابلے مزید سخت ہونے کی توقع ہے۔
