بھارتی میڈیا کی رپورٹس کے مطابق ممبئی کرائم برانچ نے انکشاف کیا ہے کہ انڈر ورلڈ گینگ کی جانب سے فروری سے اپریل کے دوران رنکو سنگھ کو تین بار دھمکی آمیز کالز موصول ہوئیں جن میں ان سے 5 کروڑ روپے تاوان کا مطالبہ کیا گیا۔

بھارتی میڈیا کے مطابق پولیس نے اس کیس کے سلسلے میں 2 مشتبہ افراد کو انٹرپول کی مدد سے ویسٹ انڈیز سے گرفتار کیا ہے، زیر حراست دونوں ملزمان کو اس سے قبل سابق ایم ایل اے بابا صدیقی کے بیٹے ذیشان صدیقی سے 10 کروڑ روپے تاوان مانگنے کے الزام میں بھی حراست میں لیا گیا تھا۔

رپورٹ میں بتایا گیا کہ دوران تفتیش زیر حراست ایک ملزم نے رنکو سنگھ سے تاوان مانگنے کے لیے رابطہ کرنے کا اعتراف کیا ہے۔

یہ بھی پڑھیں: محمد عامر کا ریٹائرمنٹ واپس لینے کی افواہوں پر ردعمل آگیا

واضح رہے کہ رنکو سنگھ جن کا تعلق بھارتی اتر پردیش کے شہر علی گڑھ سے ہے، انہوں نے محدود وسائل میں رہتے ہوئے اپنی کرکٹ سے شہرت حاصل کی ،رِنکو سنگھ نے بھارت کی جانب سے اپنا پہلا انٹرنیشنل میچ 18 اگست 2023 کو آئرلینڈ کے خلاف کھیلا تھا۔

رنکو سنگھ اب تک 2 ون ڈے اور 34 ٹی ٹوئنٹی انٹرنیشنل میچز میں بھارت کی نمائندگی کر چکے ہیں ، انہوں نے حال ہی میں ایشیا کپ کے فائنل میں پاکستان کے خلاف بھارت کی جیت میں اہم کردار ادا کیا تھا، جو ان کا ٹورنامنٹ میں پہلا میچ تھا۔