میچ ریفری رچی رچرڈسن نے دونوں کھلاڑیوں کا کیس الگ الگ سنا۔

ذرائع کے مطابق یہ شکایت 21 ستمبر کو ہونے والے میچ کے دوران دونوں کھلاڑیوں کی جانب سے کیے گئے مخصوص اشاروں پر کی گئی۔ صاحبزادہ فرحان سے ان کی گن سیلیبریشن پر سوالات کیے گئے جس پر انہوں نے مؤقف اختیار کیا کہ یہ خوشی کے اظہار کا ایک عام انداز ہے جو کئی کھلاڑی ماضی میں بھی اپنا چکے ہیں۔

فرحان نے اپنے دفاع میں کہا کہ ایم ایس دھونی اور ویوین رچرڈز جیسے کھلاڑی بھی گن سیلیبریشن کر چکے ہیں اور پاکستان میں اس طرح کا اظہار مسرت معمول کی بات ہے۔

دوسری جانب حارث رؤف سے0-6 کے اشارے پر سوالات کیے گئے۔ حارث نے جواب میں کہا کہ چھکے کے لیے 6 اور صفر کے لیے 0 کا اشارہ عام طور پر استعمال ہوتا ہےاس میں قابل اعتراض بات کیا ہے؟

یہ بھی پڑھیں: آئی سی سی نے بھارتی کپتان کو آئندہ سیاسی بیان بازی سے روک دیا

انہوں نے مزید کہا کہ اگر بی سی سی آئی کو میرے اشارے پر اعتراض ہے تو وہ واضح کرے کہ انہوں نے اس کا مطلب کیا لیا؟ یہ مبہم اور بلاجواز ہے اس لیے اسے خارج کیا جائے۔

ذرائع کا کہنا ہے کہ بی سی سی آئی نے اشاروں سے متعلق کسی قسم کی واضح وضاحت جمع نہیں کروائی۔ اب آئی سی سی انکوائری کمیٹی دونوں کھلاڑیوں کے بیانات اور دستیاب شواہد کی روشنی میں حتمی فیصلہ کرے گی۔