قومی کرکٹ ٹیم کے سابق کپتان بابر اعظم نے نیوزی لینڈ کیخلاف تین ون ڈے میچز کی سیریز کے پہلے میچ میں 78 رنز بنائے، یہ بابر اعظم کے ون ڈے انٹرنیشنل کیریئر کی 36 ویں نصف سنچری تھی۔

نیوزی لینڈ کیخلاف پاکستان گوکہ یہ ہار گیا لیکن بابر نے اس میچ میں ہدف کے تعاقب میں کم سے کم اننگز میں زیادہ نصف سنچریاں بنانے کا سری لنکا کے لیجنڈ کرکٹر کمار سنگاکارا اور شکیب الحسن کا ریکارڈ توڑ دیا۔

بابر اعظم اب تک ون ڈے انٹرنیشنل میچز میں 300 سے زائد رنز کے ہدف کے تعاقب میں 27 اننگز میں 12 نصف سنچریاں بنا چکے ہیں جبکہ سری لنکا کے سابق کپتان لیجنڈری کرکٹر کمار سنگاکارا نے 35 جبکہ بنگلہ دیش کے سابق کپتان شکیب الحسن نے 32 اننگز میں 12، 12 نصف سنچریاں بنائی تھیں۔

کم سے کم اننگز میں زیادہ سے زیادہ نصف سنچریاں بنانے والوں کی فہرست میں بھارتی بلے باز ویرات کوہلی پہلے نمبر پر ہیں جنہوں نے 35 اننگز میں 17 نصف سنچریاں سکور کررکھی ہیں جبکہ بھارت کے ہی روہت شرما 32 اننگز میں 13 نصف سنچریا بنا کر اس فہرست میں دوسرے نمبر پر ہیں۔

واضح رہے کہ بابر اعظم اب تک نیوزی لینڈ کیخلاف ہدف کے تعاقب میں 16 اننگز میں 8 نصف سنچریاں سکور کرچکے ہیں جو کسی بھی پاکستانی بیٹر کی بہترین کارکردگی ہے۔