تفصیلات کے مطابق وکٹ کیپر بلے باز اور کپتان محمد رضوان نے شکست کے بعد اپنی ٹیم کی کارکردگی پر کھل کر بات کرتے ہوئے کہا کہ ٹاس جیتنے کے باوجود ٹیم کو اس کا فائدہ نہیں ملا، ہم 280 رنز کا ہدف مقرر کرنا چاہتے تھے لیکن بھارت کے بولرز نے درمیانی اوورز میں بہت عمدہ باؤلنگ کی۔

محمد رضوان کا کہنا تھا کہ جب سعود شکیل اور میں بیٹنگ کر رہے تھے، ہمارا منصوبہ لمبی پارٹنرشپ بنانے کا تھا، مگر غلط شاٹ سلیکشن کی وجہ سے وکٹیں گنوائیں اور اس لیے ہم 240 تک محدود ہو گئے۔

انہوں نے کہا کہ ابرار احمد نے ہمیں ایک اہم وکٹ دلائی، لیکن ویرات کوہلی اور شبمن گِل نے شاندار بیٹنگ کرتے ہوئے ہمیں کھیل سے باہر کر دیا۔

رضوان نے ٹیم کی فیلڈنگ پر بھی تنقید کرتے ہوئے کہا کہ ہمیں اپنی فیلڈنگ میں بہتری لانے کی اشد ضرورت ہے، ہم نے اس میچ میں بہت غلطیاں کیں اور یہ غلطیاں بار بار دہرائی جا رہی ہیں، امید ہے کہ آئندہ ان پر کام کریں گے۔