اس اسکواڈ میں اہم تبدیلیاں کی گئی ہیں اور نئے کھلاڑیوں کو موقع دیا گیا ہے۔علاوہ ازیں فخر زمان، خوشدل شاہ، سعود شکیل اور فہیم اشرف کی واپسی بھی ہوئی ہے۔

پاکستان کرکٹ بورڈ نے اس بات کی تصدیق کی ہے کہ یہ ٹیم نیوزی لینڈ اور جنوبی افریقہ کیخلاف ہونے والی سہ فریقی ون ڈے سیریز میں بھی حصہ لے گی۔

اسکواڈ میں بابر اعظم (کپتان)، کامران غلام، طیب طاہر اور سعود شکیل جیسے بلے باز شامل ہیں، جبکہ آل راؤنڈرز میں فہیم اشرف، خوشدل شاہ اور سلمان علی آغا (نائب کپتان) شامل ہیں۔ وکٹ کیپر بیٹرز میں محمد رضوان اور عثمان خان ٹیم کا حصہ ہوں گے۔

اس کے ساتھ ساتھ اسکواڈ میں اسپنر ابرار احمد اور فاسٹ بولرز حارث رؤف، محمد حسنین، نسیم شاہ اور شاہین شاہ آفریدی بھی شامل ہیں۔

پاکستان کرکٹ ٹیم کے سلیکٹر اسد شفیق کا کہنا تھا کہ ہوم کنڈیشنز میں بہترین کارکردگی دکھانے والے کرکٹرز کو اسکواڈ میں شامل کیا گیا ہے۔

انہوں نے کہا کہ ٹیم میں صائم ایوب کو شامل نہ کرنا تکلیف دہ ہے لیکن فیصلہ جلدبازی میں نہیں کیا گیا۔

واضح رہے کہ پاکستان کرکٹ ٹیم اپنا پہلا میچ 19 فروری کو نیوزی لینڈ کیخلاف کراچی میں کھیلے گی، جبکہ سہ فریقی سیریز کا آغاز 8 فروری کو لاہور میں پاکستان اور نیوزی لینڈ کے درمیان ہوگا۔ قومی ٹیم 4 فروری سے اپنی تیاریوں کا آغاز کرے گی۔