تمیم اقبال نے کرکٹ سے ریٹائرمنٹ کا اعلان سوشل میڈیا پوسٹ پر اپنے پیغام میں کہا کہ کافی عرصے سے انٹرنیشنل کرکٹ سے دور رہا اور اب یہ میرے انٹرنیشنل کیریئر کا اختتام ہے، اس حوالے سے کافی عرصے سے سوچ رہا تھا۔
انہوں نے کہا کہ چیمپیئنز ٹرافی جیسا بڑا ایونٹ قریب ہے تو میں اپنے آپ کو ڈسکس نہیں کروانا چاہتا، ریٹائرمنٹ یا کھیلنے کا فیصلہ کسی بھی ایتھلیٹ یا کرکٹر کا ذاتی ہوتا ہے، سلیکشن کمیٹی نے بھی میری سلیکشن کے حوالے سے مجھ سے پوچھا مگر میں نے ریٹائرمنٹ کا فیصلہ کر لیا تھا، ان تمام افراد کا مجھے اتنا اہم سمجھنے پر شکریہ۔
35 سالہ تمیم اقبال نے دوسری مرتبہ ریٹائرمنٹ کا اعلان کیا۔ انہوں نے پہلی مرتبہ 2023ء میں انٹرنیشنل کرکٹ چھوڑنے کا اعلان کیا تھا، تاہم ایک ہی دن بعد اپنا فیصلہ واپس لے لیا تھا۔
خیال رہے تمیم اقبال نے بنگلادیش کی طرف سے 70 ٹیسٹ میں 5134، ایک روز 243 میچز میں 8357 اور 78 ٹی 20 مقابلوں میں 1758 رنز اسکور کیے ہیں۔ انہوں نے 2008ء میں نیوزی لینڈ کے خلاف ٹیسٹ ڈیبیو کیا جبکہ 2007ء میں ایک روزہ اور ٹی 20 کرکٹ کا آغاز کر دیا تھا۔
