ان کا کہنا تھا کہ ٹیم کو بنگلا دیش کے خلاف سیریز کی غلطیوں سے سبق سیکھنا ہوگا اور انگلینڈ کے خلاف بہتر کارکردگی کا مظاہرہ کرنا ہوگا۔

 

 

پریس کانفرنس کے دوران شان مسعود نے تسلیم کیا کہ بنگلادیش کے خلاف سیریز کا نتیجہ مایوس کن رہا۔ انہوں نے کہا کہ تمام کھلاڑیوں کو خراب کارکردگی کا دکھ ہے، لیکن کامیابی کے لیے کھلاڑیوں کو مسلسل مواقع فراہم کرنا ضروری ہے۔ خرم شہزاد جیسے اہم کھلاڑی کی انجری ٹیم کے لیے نقصان دہ ثابت ہوئی، لیکن ٹیسٹ کرکٹ میں تسلسل کے ساتھ میچز کھیلنا ضروری ہے تاکہ کارکردگی بہتر ہو سکے۔

 

 

شان مسعود کا کہنا تھا کہ ٹیم کا اعلان کیا جا چکا ہے، لیکن ملتان کی کنڈیشنز کے بارے میں کچھ زیادہ معلوم نہیں ہے۔ ان کی کوشش ہوگی کہ پہلے ٹیسٹ میچ میں ٹیم بہتر آغاز کرے۔ انہوں نے کہا کہ آسٹریلیا کے خلاف سیریز کے بعد کچھ مثبت پہلو سامنے آئے تھے، لیکن بنگلہ دیش کے خلاف وہی چیزیں نتیجہ خیز ثابت نہ ہو سکیں۔

 

 

کپتان نے وضاحت کی کہ بنگلا دیش کے خلاف سیریز میں ٹیم کے اتحاد میں کوئی مسئلہ نظر نہیں آیا اور ڈریسنگ روم کا ماحول بہتر رہا۔ انہوں نے مزید کہا کہ ٹیسٹ کرکٹ جسمانی اور ذہنی طور پر مضبوطی کا تقاضا کرتی ہے، اور ہمیں بطور ٹیم ان چیزوں کو بہتر کرنا ہوگا تاکہ مستقبل میں کامیابی حاصل کی جا سکے۔

 

 

شان مسعود نے وکٹ کیپنگ کے حوالے سے کہا کہ محمد رضوان مستقل ٹیم کا حصہ ہیں، لیکن سرفراز احمد کو مختصر مدت کے لیے ایک بہترین متبادل کے طور پر شامل کیا گیا ہے۔ انہوں نے کہا کہ سرفراز کی گذشتہ پرفارمنس کی بنیاد پر انہیں موقع دیا گیا ہے اور نوجوان وکٹ کیپرز کی تربیت جاری ہے تاکہ مستقبل میں وہ ٹیم کا حصہ بن سکیں۔

 

 

شان مسعود نے کہا کہ بابراعظم دنیا کے بہترین بلے بازوں میں سے ہیں اور ٹیم میں شامل ہر کھلاڑی کو موقع دیا جائے گا۔ انہوں نے مزید کہا کہ نوجوان کھلاڑی جیسے کامران غلام اور صائم ایوب کو بھی پرفارمنس دکھانے کا بھرپور موقع ملے گا۔ کپتان نے اس بات پر زور دیا کہ کھلاڑیوں کو سپورٹ کرنے سے ٹیم کو بہتر بنانے میں مدد ملے گی۔

 

 

شان مسعود نے انگلینڈ کے خلاف سیریز کو پاکستان کرکٹ کے لیے اہم قرار دیا۔ انہوں نے کہا کہ کھلاڑیوں نے کافی محنت کی ہے اور انگلینڈ کے خلاف سیریز میں اچھی کارکردگی دکھا کر بنگلادیش سیریز کی ناکامیوں کا ازالہ کرنے کا موقع ہے۔ ان کا مزید کہنا تھا کہ ٹیم میں مستقل مزاجی دکھانا ضروری ہے اور امید ظاہر کی کہ اس سیریز کے یادگار نتائج سامنے آئیں گے۔