لاہور ایک بار پھر دنیا کا آلودہ ترین شہر بن گیا
تفصیلات کے مطابق لاہور میں فضائی آلودگی کی شدت میں ایک بار پھر اضافہ ریکارڈ کیا گیا ہے، جس کے باعث شہریوں کو سموگ اور آلودہ فضا کے باعث صحت کے مسائل کا سامنا ہے۔ شہر کا مجموعی ایئر کوالٹی انڈیکس 284 ریکارڈ کیا گیا، جو فضائی آلودگی کی انتہائی خراب صورتحال کی نشاندہی کرتا ہے۔
رپورٹ کے مطابق لاہور کے مختلف علاقوں میں فضائی آلودگی کی سطح مختلف رہی، تاہم ٹاؤن شپ میں صورتحال سب سے زیادہ خراب رہی، جہاں ایئر کوالٹی انڈیکس 637 تک پہنچ گیا۔ ماہرین کے مطابق آلودہ فضا میں طویل وقت گزارنے سے سانس اور آنکھوں سمیت دیگر طبی مسائل پیدا ہوسکتے ہیں۔
دوسری جانب محکمہ موسمیات کے مطابق لاہور میں کم سے کم درجہ حرارت 12 ڈگری سینٹی گریڈ ریکارڈ کیا گیا ہے جبکہ آج شہر میں زیادہ سے زیادہ درجہ حرارت 27 ڈگری سینٹی گریڈ رہنے کا امکان ہے۔
ماہرین صحت نے شہریوں کو سموگ کے مضر اثرات سے محفوظ رہنے کیلئے احتیاطی تدابیر اختیار کرنے کی ہدایت کی ہے۔
شہریوں کو مشورہ دیا گیا ہے کہ غیر ضروری طور پر گھروں سے باہر نکلنے سے گریز کریں اور باہر جاتے وقت فیس ماسک کا استعمال ضرور کریں۔
ماہرین صحت نے بچوں، بزرگوں اور سانس کے مسائل سے دوچار افراد کو خصوصی احتیاط برتنے کی بھی تاکید کی ہے۔