لاہور میں بغیر ہیلمٹ موٹرسائیکل سواروں کے خلاف سخت کارروائی کا فیصلہ
سٹی ٹریفک آفیسر لاہور عمارہ اطہر کی ہدایت پر ہونے والی خصوصی مہم کے دوران بغیر ہیلمٹ موٹرسائیکل سواروں کو روک کر قانونی کارروائی کی جائے گی۔ اس حوالے سے شہر کے تمام ایس پیز اور ڈی ایس پیز کو بھی ضروری ہدایات جاری کردی گئی ہیں۔
ٹریفک حکام کے مطابق لاہور کے اہم داخلی اور خارجی راستوں پر خصوصی ٹیمیں تعینات کی جائیں گی، جہاں موٹرسائیکل سواروں کی چیکنگ کی جائے گی۔ بغیر ہیلمٹ سفر کرنے والوں کے خلاف قانون کے مطابق کارروائی ہوگی۔
یہ بھی پڑھیں: آئی ایم ایف کا پاکستان سے فیول سبسڈی ختم کرنے کا مطالبہ
سی ٹی او لاہور نے واضح کیا ہے کہ بغیر ہیلمٹ موٹرسائیکل سواروں کو شہر میں داخل ہونے کی اجازت نہیں دی جائے گی، جبکہ شہریوں سے سفر کے دوران ہیلمٹ لازمی پہننے کی اپیل کی گئی ہے۔
سٹی ٹریفک آفیسر عمارہ اطہر نے کہا ہے کہ ہیلمٹ کے خلاف کارروائی کا مقصد صرف چالان یا سرکاری ریونیو حاصل کرنا نہیں بلکہ شہریوں کی قیمتی جانوں کا تحفظ ہے۔
انہوں نے موٹرسائیکل سواروں سے اپیل کی کہ وہ پولیس کارروائی یا چالان کے خوف سے نہیں بلکہ اپنی اور اپنے خاندان کی حفاظت کے لیے ہر سفر کے دوران معیاری ہیلمٹ ضرور پہنیں۔
ٹریفک پولیس کے مطابق ہیلمٹ کا استعمال معمولی احتیاط نظر آتا ہے، تاہم حادثے کی صورت میں یہ جان بچانے میں اہم کردار ادا کرسکتا ہے۔
