آئی ٹی گریجویٹس کیلئے خوشخبری، ہزاروں روپے ماہانہ وظیفہ
پروگرام کے تحت منتخب گریجویٹس کو 4 سے 5 ماہ کی انٹرن شپ کے دوران 50 ہزار روپے ماہانہ وظیفہ دیا جائے گا۔
حکومت پنجاب کے مطابق پروگرام کا مقصد نوجوانوں کو انڈسٹری کے مطابق عملی تجربہ فراہم کرنا، ان کی ڈیجیٹل صلاحیتوں کو بہتر بنانا اور ٹیکنالوجی کے شعبے میں روزگار کے بہتر مواقع پیدا کرنا ہے۔
پروگرام کے لیے آئی ٹی یا متعلقہ شعبوں میں کم از کم 16 سالہ تعلیم (بی ایس/آنرز) رکھنے والے امیدوار درخواست دے سکتے ہیں۔ متعلقہ شعبوں میں کمپیوٹر سائنس، انفارمیشن ٹیکنالوجی، آرٹیفیشل انٹیلی جنس، سائبر سکیورٹی، ڈیٹا سائنس، گرافک ڈیزائننگ اور انفارمیشن سسٹمز شامل ہیں۔
امیدوار کا گزشتہ 4 سال کے دوران ڈگری مکمل کرنا اور درخواست کے وقت بے روزگار ہونا لازمی قرار دیا گیا ہے۔
یہ بھی پڑھیں: پی آئی اے میں فضائی میزبانوں کی بھرتیوں کا اعلان
پنجاب کا ڈومیسائل رکھنے والے مرد، خواتین اور خواجہ سرا افراد اس پروگرام کے لیے درخواست دینے کے اہل ہیں۔
امیدواروں کو درخواست دیتے وقت قومی شناختی کارڈ یا ب فارم، پنجاب کا ڈومیسائل، تعلیمی اسناد یا ڈگری، تازہ تصویر اور اپ ڈیٹ شدہ سی وی جمع کرانا ہوگی۔ سابقہ تجربے کا سرٹیفکیٹ، اگر موجود ہو، تو وہ بھی فراہم کیا جاسکتا ہے۔
انٹرن شپ پروگرام کے تحت متعلقہ آئی ٹی کمپنیوں کو بھی فی انٹرن 12 ہزار 500 روپے ماہانہ مالی معاونت فراہم کی جائے گی تاکہ وہ انٹرنز کو عملی منصوبوں پر کام کرنے کا موقع دے سکیں۔
امیدواروں کے انتخاب کا عمل پروفائل بنانے، ایپٹی ٹیوڈ ٹیسٹ، ہائر ایجوکیشن کمیشن (HEC) سے ڈگری کی تصدیق اور انٹرویو پر مشتمل ہوگا۔
منتخب امیدواروں کو انٹرن شپ کے ساتھ بین الاقوامی سطح پر تسلیم شدہ آئی ٹی سرٹیفکیشن بھی فراہم کی جائے گی۔
اہل امیدوار پنجاب حکومت کے آفیشل پورٹل cmitinterns.punjab.gov.pk پر جاکر آن لائن رجسٹریشن کرسکتے ہیں۔
