پہلے مرحلے میں صوابی اور پھر آگے جائیں گے،سہیل آفریدی
پشاور میں پریس کانفرنس کرتے ہوئے سہیل آفریدی نے کہا کہ لانگ مارچ کے حوالے سے پارٹی کی جانب سے مکمل تیاری کی جارہی ہے، 4 اکتوبر کا مارچ ہر صورت ہوگا جس کیلئے کارکنان کو متحرک کیا جا رہا ہے۔
وزیراعلیٰ خیبرپختونخوا کا کہنا تھا کہ مارچ سے دو روز قبل کارکنان کیلئے مشران کی فہرست جاری کی جائے گی، جس میں مکمل چین آف کمانڈ موجود ہوگا، اگر کوئی رہنما موجود نہ ہوا تو دوسرا رہنما اس کی ذمہ داری سنبھالے گا۔
سہیل آفریدی نے کہا کہ اگر کوئی کارکن مشران کی ہدایات پر عمل نہیں کرے گا تو وہ ہماری پارٹی میں سے نہیں ہوگا، علی امین گنڈاپور کے حوصلے بلند ہیں اور وہ ان کے ساتھ مل کر مارچ کی قیادت کریں گے۔
وزیراعلیٰ نے کہا کہ شوکت یوسفزئی کی جانب سے لانگ مارچ ملتوی کرنے سے متعلق خط انہوں نے نہیں پڑھا، تاہم اگر خط ان کے پاس آیا تو وہ اسے پڑھ کر پھاڑ دیں گے۔
سہیل آفریدی نے مزید کہا کہ اگر کسی نے ایڈونچر کرنے یا ملکی حالات زبردستی خراب کرنے کی کوشش کی تو عوام کا ردعمل سامنے آئے گا۔
یہ بھی پڑھیں:4 اکتوبر کو لانگ مارچ ہر صورت ہوگا، سہیل آفریدی
واضح رہے کہ پاکستان تحریک انصاف (پی ٹی آئی) نے 27 ستمبر کو ہونے والا لانگ مارچ مؤخر کرکے 4 اکتوبر کو پشاور سے اسلام آباد کی جانب مارچ کرنے کا اعلان کیا ہے۔
