خواتین کے شناختی کارڈ بنوانے کیلئے نادرا کا نئے طریقے کا اعلان
اس سہولت کے تحت مخصوص شرائط پوری کرنے والی خواتین کو برتھ سرٹیفکیٹ کے بغیر بھی شناختی کارڈ بنوانے کی سہولت فراہم کی جائے گی۔
نادرا کے مطابق 18 سال سے زائد عمر کی ایسی خواتین جن کے پاس برتھ سرٹیفکیٹ موجود نہیں، وہ مقررہ مدت کے دوران شناختی کارڈ کیلئے درخواست دے سکیں گی، شادی شدہ خواتین کمپیوٹرائزڈ نکاح نامے کی بنیاد پر شناختی کارڈ بنوا سکیں گی۔
حکام کے مطابق شادی شدہ خاتون کی درخواست کیلئے اس کے شوہر یا والدین میں سے کسی ایک کی بائیومیٹرک تصدیق لازمی ہوگی۔ اس اقدام کا مقصد شناختی دستاویزات کے حصول کے عمل کو آسان بنانا اور خواتین کو درپیش مشکلات میں کمی لانا ہے۔
نادرا کے مطابق 18 سال سے زائد عمر کی غیر شادی شدہ خواتین کیلئے بھی مخصوص شرائط مقرر کی گئی ہیں۔ ایسی درخواست گزار خواتین کے پاس والدین، بہن یا بھائی میں سے کسی ایک کا شناختی کارڈ ہونا ضروری قرار دیا گیا ہے۔
غیر شادی شدہ خاتون کی شناخت کی تصدیق کیلئے والدین یا بہن بھائی میں سے متعلقہ فرد کا بائیومیٹرک تصدیق کیلئے ساتھ موجود ہونا بھی ضروری ہوگا۔
نادرا کی جانب سے فراہم کردہ معلومات کے مطابق یہ خصوصی سہولت محدود مدت کیلئے دستیاب ہوگی۔ شہریوں کو ہدایت کی گئی ہے کہ وہ مقررہ مدت کے دوران متعلقہ نادرا مرکز سے رجوع کرکے ضروری دستاویزات اور بائیومیٹرک تصدیق کے تقاضے پورے کریں۔
یہ بھی پڑھیں:بینظیر انکم سپورٹ پروگرام کی خواتین کیلئے اہم خبر
واضح رہے کہ اس سہولت کے ذریعے خواتین کیلئے شناختی کارڈ کے حصول کا عمل مزید آسان بنانے کی کوشش کی گئی ہے۔
