دہشتگردوں کی ایمبولینس پر فائرنگ، 2 ریسکیو اہلکار شہید
سکیورٹی ذرائع کے مطابق درازندہ میں بارود سے بھری گاڑی کو انسداد اسمگلنگ چیک پوسٹ سے ٹکرایا گیا، جس کے نتیجے میں متعدد افراد جاں بحق اور زخمی ہوئے۔ دھماکے کے بعد زخمیوں کو ہسپتال منتقل کرنے کیلئے ریسکیو ٹیمیں موقع پر پہنچیں۔
جب ریسکیو اہلکار زخمیوں کو ایمبولینس کے ذریعے ہسپتال لے جارہے تھے تو مبینہ طور پر خوارجی دہشتگردوں نے ایمبولینس کو نشانہ بنایا اور فائرنگ کردی، فائرنگ کے نتیجے میں 2 ریسکیو اہلکار شہید ہوگئے۔
سکیورٹی ذرائع کا کہنا ہے کہ حملے کے بعد سکیورٹی فورسز نے علاقے میں دہشتگردوں کیخلاف آپریشن شروع کردیا ہے، جبکہ واقعے کے دیگر پہلوؤں کی بھی تحقیقات جاری ہیں۔
قبل ازیں درازندہ میں چیک پوسٹ پر ہونے والے مبینہ خودکش حملے میں 2 سالہ بچے اور 2 خواتین سمیت 12 افراد کے جاں بحق ہونے کی اطلاعات سامنے آئی تھیں، جبکہ تقریباً 30 افراد زخمی ہوئے ہیں۔
زخمیوں میں بعض افراد کی حالت تشویشناک ہے، جس کے باعث ہلاکتوں میں اضافے کا خدشہ ظاہر کیا گیا ہے۔
حکام کی جانب سے علاقے میں سکیورٹی مزید سخت کردی گئی ہے، جبکہ قانون نافذ کرنے والے ادارے حملے میں ملوث عناصر کی تلاش اور علاقے کو محفوظ بنانے کیلئے کارروائی کررہے ہیں۔
یہ بھی پڑھیں:بینظیر انکم سپورٹ پروگرام کی خواتین کیلئے اہم خبر
دوسری جانب ریسکیو اہلکاروں کی شہادت کے بعد امدادی کارروائیوں میں مصروف اداروں کے اہلکاروں کی حفاظت کے حوالے سے بھی اقدامات کیے جارہے ہیں۔
