مٹیاری میں نہر کنارے بیٹھے 3 نوجوان ڈوب گئے
پولیس کے مطابق واقعہ مٹیاری کے شوگر مل روڈ پر پیش آیا، جہاں تین نوجوان نہر کے کنارے بیٹھے ہوئے تھے کہ اچانک وہ نہر میں جاگرے اور گہرے پانی میں ڈوب گئے۔
واقعے کی اطلاع ملتے ہی پولیس اور ریسکیو ٹیمیں موقع پر پہنچ گئیں اور امدادی کارروائی شروع کردی۔ ریسکیو اہلکاروں نے کارروائی کرتے ہوئے تینوں نوجوانوں کو نہر سے نکال لیا، تاہم وہ جانبر نہ ہوسکے۔
پولیس حکام کے مطابق ہلاک ہونے والے نوجوانوں کی شناخت کمار، انیل اور ریتھک کے نام سے ہوئی ہے، ابتدائی معلومات کے مطابق تینوں نوجوان مذہبی رسومات کی ادائیگی کیلئے نہر کے کنارے بیٹھے تھے۔
پولیس نے افسوسناک واقعے کی مزید تفصیلات جمع کرنا شروع کردی ہیں جبکہ حادثے کے حوالے سے ضروری قانونی کارروائی بھی کی جارہی ہے۔
واقعے کی خبر علاقے میں پہنچتے ہی اہل خانہ اور عزیز و اقارب غم سے نڈھال ہوگئے، مقامی افراد نے تین نوجوانوں کی اچانک موت پر گہرے دکھ اور افسوس کا اظہار کیا۔
یہ بھی پڑھیں:مزار قائد پر گارڈز کی تبدیلی کی پروقار تقریب
حکام کی جانب سے شہریوں کو نہروں اور دیگر آبی گزرگاہوں کے قریب احتیاطی تدابیر اختیار کرنے کی ہدایت کی جاتی رہی ہے، خصوصاً ایسے مقامات پر جہاں پانی گہرا ہو اور حفاظتی انتظامات موجود نہ ہوں۔
