ٹک ٹاک فالوورز کا تنازع ، بڑی بہن نے چھوٹی بہن کو قتل کردیا
پولیس کے مطابق دونوں بہنیں فوڈ وی لاگنگ کرتی تھیں اور مختلف سوشل میڈیا پلیٹ فارمز پر متحرک رہتی تھیں۔ ویڈیوز بنانے اور فالوورز بڑھانے کے معاملے پر دونوں کے درمیان تلخ کلامی ہوئی، جو شدت اختیار کرتے ہوئے خونریز جھگڑے میں تبدیل ہوگئی۔
پولیس کا کہنا ہے کہ جھگڑے کے دوران بڑی بہن نے طیش میں آکر چھوٹی بہن پر چھریوں سے حملہ کردیا، جس کے نتیجے میں وہ شدید زخمی ہوئی اور جانبر نہ ہوسکی۔
مقتولہ کا تعلق ایک محنت کش خاندان سے تھا۔ اس کے والد پیشے کے اعتبار سے ڈرائیور ہیں اور ان کی 6 بیٹیاں اور ایک بیٹا ہے۔
واقعے کے بعد مقتولہ کے والد نے گہرے دکھ اور افسوس کا اظہار کرتے ہوئے کہا کہ ان کی بیٹیاں سوشل میڈیا کی سرگرمیوں میں مصروف رہتی تھیں اور اسی معاملے نے ایک المناک صورتحال کو جنم دیا، جس کے نتیجے میں انہیں اپنی ایک بیٹی سے محروم ہونا پڑا۔
واقعے کی اطلاع ملتے ہی پولیس موقع پر پہنچ گئی اور مقتولہ کی لاش کو تحویل میں لے کر قانونی کارروائی شروع کردی۔
پولیس نے مقدمہ درج کرکے قتل میں مبینہ طور پر ملوث بڑی بہن کو گرفتار کرلیا ہے جبکہ واقعے کی مزید تفتیش اور قانونی کارروائی جاری ہے۔
