بابا بلھے شاہؒ کے عرس پر مقامی تعطیل کا اعلان
بابا بلھے شاہؒ کے عرس کی تین روزہ تقریبات کا آج دوسرا روز ہے، جس میں ملک بھر سے بڑی تعداد میں زائرین قصور پہنچ رہے ہیں۔ زائرین حضرت بابا بلھے شاہؒ کے مزار پر حاضری دے کر فاتحہ خوانی اور خصوصی دعائیں کررہے ہیں۔
عرس کے دوسرے روز بھی مختلف روح پرور محافل کا انعقاد کیا جارہا ہے، جہاں صوفیانہ کلام اور ذکر و اذکار کی محافل میں عقیدت مند بھرپور شرکت کررہے ہیں۔
ضلعی انتظامیہ کے مطابق عرس کے موقع پر 29 اگست بروز ہفتہ قصور میں مقامی تعطیل ہوگی، تعطیل کا اطلاق ڈپٹی کمشنر کے ماتحت کام کرنے والے ضلعی دفاتر اور متعلقہ ضلعی سرکاری اداروں پر ہوگا۔
انتظامیہ کی جانب سے عرس کے دوران زائرین کی حفاظت کیلئے سکیورٹی کے فول پروف انتظامات کیے گئے ہیں۔ دربار اور اس کے اطراف میں پولیس اہلکار تعینات ہیں، جبکہ اہم مقامات پر نگرانی بھی کی جارہی ہے۔
زائرین کی سہولت کیلئے ضلعی انتظامیہ کی جانب سے وسیع لنگر کا بھی اہتمام کیا گیا ہے تاکہ عرس میں شرکت کیلئے آنے والے عقیدت مندوں کو کھانے پینے کی سہولت فراہم کی جاسکے۔
یہ بھی پڑھیں:10 روپے کا نوٹ کیوں بند ہو رہا ہے؟ وجہ سامنے آگئی
بلھے شاہؒ کے 269ویں عرس کی تین روزہ تقریبات کل اختتام پذیر ہوں گی،عرس کے آخری روز بھی بڑی تعداد میں زائرین کی آمد متوقع ہے، جس کے پیش نظر سکیورٹی اور دیگر انتظامات کو برقرار رکھا جائے گا۔
