کراچی انٹر بورڈ کے سائنس جنرل گروپ کے نتائج جاری
چیئرمین انٹر بورڈ کراچی فقیر محمد لاکھو نے نتائج کا اعلان کرتے ہوئے بتایا کہ سائنس جنرل گروپ کے امتحانات میں پہلی پوزیشن جنت بنت علی دوست نے حاصل کی، رول نمبر 625716 کی حامل طالبہ نے مجموعی طور پر 1100 میں سے 1005 نمبرز حاصل کرکے اے ون گریڈ حاصل کیا۔
دوسری پوزیشن آدم جی گورنمنٹ سائنس کالج کے طالبعلم حمزہ شکیل ولد شکیل احمد نے حاصل کی، رول نمبر 605596 کے حامل طالبعلم نے 1003 نمبرز حاصل کرکے اے ون گریڈ حاصل کیا۔
بحریہ کالج ایم ٹی خان روڈ کی طالبہ لائبہ ذوالفقار بنت ذوالفقار علی نے 989 نمبرز کے ساتھ تیسری پوزیشن حاصل کی، رول نمبر 619907 رکھنے والی طالبہ نے بھی اے ون گریڈ حاصل کیا۔
چیئرمین انٹر بورڈ کراچی فقیر محمد لاکھو نے امتحانات میں نمایاں کارکردگی پر آدم جی گورنمنٹ سائنس کالج کو مبارکباد دیتے ہوئے کہا کہ ادارے نے پری انجینئرنگ میں پہلی، دوسری اور تیسری پوزیشنز حاصل کرنے کے بعد سائنس جنرل گروپ میں بھی دوسری پوزیشن حاصل کی ہے۔
ان کا کہنا تھا کہ یہ کامیابی طلبہ، اساتذہ اور پرنسپل کی محنت، لگن اور بہترین رہنمائی کا نتیجہ ہے، انٹرمیڈیٹ کے نتائج میں سرکاری تعلیمی اداروں کے طلبہ کی نمایاں کامیابیاں سندھ میں تعلیمی معیار میں بہتری کی عکاسی کرتی ہیں۔
رزلٹ دیکھنے کیلئے اس لنک پر کلک کریں:
ناظم امتحانات زرینہ راشد نے نتائج کی تفصیلات بتاتے ہوئے کہا کہ سائنس جنرل گروپ کے امتحانات کیلئے مجموعی طور پر 18 ہزار 913 امیدواروں نے رجسٹریشن کرائی، جن میں سے 18 ہزار 591 امیدوار امتحانات میں شریک ہوئے۔
ان میں سے 10 ہزار 511 امیدوار کامیاب قرار پائے، یوں کامیابی کا مجموعی تناسب 56.54 فیصد رہا۔
یہ بھی پڑھیں:لاہور بورڈ کے نویں جماعت کے نتائج کا اعلان
نتائج کے مطابق 748 امیدواروں نے اے ون، 2193 نے اے، 3184 نے بی، 3076 نے سی، 1280 نے ڈی جبکہ 20 امیدواروں نے ای گریڈ حاصل کیا۔
