سپریم کورٹ:عظمیٰ خان نے عمران خان کی ہسپتال منتقلی کیلئے درخواست دائر کردی
تفصیلات کے مطابق عمران خان کی بہن عظمیٰ خان کی جانب سے دائر درخواست میں مؤقف اختیار کیا گیا ہے کہ توہین عدالت سے متعلق درخواست کو فوری سماعت کیلئے مقرر کیا جائے اور اس پر رواں یا آئندہ ہفتے سماعت کی جائے۔
درخواست میں کہا گیا کہ رجسٹرار آفس کی جانب سے فوری سماعت کیلئے دائر کی گئی پہلی درخواست مسترد کردی گئی تھی، تاہم بانی پی ٹی آئی کی جیل میں صحت مسلسل خراب ہورہی ہے، اس لیے انہیں طبی معائنے اور علاج کیلئے شفا انٹرنیشنل ہسپتال منتقل کیا جائے۔
عظمیٰ خان نے اپنی درخواست میں مؤقف اپنایا کہ سپریم کورٹ کے حکم پر جان بوجھ کر عملدرآمد نہیں کیا گیا۔ درخواست میں عدالت سے استدعا کی گئی ہے کہ 18 اگست کے عدالتی حکم پر فوری اور مکمل عملدرآمد یقینی بنایا جائے۔
درخواست میں بانی پی ٹی آئی کی صحت کے حوالے سے تشویش کا اظہار کرتے ہوئے کہا گیا کہ انہیں مناسب طبی سہولیات اور علاج کی فراہمی ضروری ہے۔
عظمیٰ خان کی جانب سے عدالت سے یہ بھی درخواست کی گئی کہ معاملے کی حساسیت کے پیش نظر توہین عدالت کی درخواست کو ترجیحی بنیادوں پر سماعت کیلئے مقرر کیا جائے تاکہ عدالتی حکم پر عملدرآمد سے متعلق صورتحال واضح ہوسکے۔
یہ بھی پڑھیں:پختونخوا اور بلوچستان میں سیکیورٹی فورسز کی کارروائیاں، 11 دہشتگرد ہلاک
واضح رہے کہ بانی پی ٹی آئی کی صحت اور انہیں ہسپتال منتقل کرنے کا معاملہ گزشتہ کچھ عرصے سے قانونی و سیاسی حلقوں میں زیر بحث ہے، جبکہ ان کے اہل خانہ کی جانب سے طبی سہولیات کی فراہمی اور علاج کے حوالے سے مطالبات سامنے آتے رہے ہیں۔
