ہوشیار! واٹس ایپ پر فراڈ کا نیا انکشاف
نیا فراڈ جعلی پارسل ڈیلیوری کالز کے ذریعے آیا ہے، اس جعلسازی میں فراڈی مبینہ طور پر خود کو معروف کوریئر کمپنیوں کے نمائندے ظاہر کرکے واٹس ایپ کال کرتے ہیں۔ جعلساز شہریوں سے رابطہ کرتے ہیں اور دعویٰ کرتے ہیں کہ وہ کوریئر کمپنی سے بات کر رہے ہیں اور ان کے لیے پارسل آ گیا ہے۔
وہ وصول کنندہ کو بتاتے ہیں کہ ڈیلیوری مکمل کرنے یا ایڈریس کی تصدیق کے لیے ان کے موبائل فون پر ایک تصدیقی کوڈ (او ٹی پی) بھیجا جائے گا۔ اس کے بعد دھوکہ باز شہری سے واٹس ایپ پر موصول ہونے والے کوڈ (او ٹی پی) کو شیئر کرنے کو کہتے ہیں، جیسے ہی متاثرہ شخص تصدیقی کوڈ فراہم کرتا ہے۔
جعلساز متاثرہ کا فون نمبر استعمال کرتے ہوئے کسی اور ڈیوائس پر واٹس ایپ اکاؤنٹ رجسٹر کر لیتے ہیں اور اکاؤنٹ کو اپنے کنٹرول میں لے لیتے ہیں۔ رسائی حاصل کرنے کے بعد، جعلساز خود کو اکاؤنٹ ہولڈر کے طور پر ظاہر کرتے متاثرہ شخص کے واٹس ایپ میں شامل خاندان کے افراد، دوستوں، ساتھیوں اور جاننے والوں کو پیغامات بھیج کر ان سے کوئی بھی ایمرجنسی ظاہر کے فوری رقم منتقلی کی درخواست کرتے ہیں۔
پی ٹی اے نے شہریوں کو مشورہ دیا ہے کہ وہ چوکس رہیں اور کبھی بھی کسی کے ساتھ واٹس ایپ کے تصدیقی کوڈز کا اشتراک نہ کریں، پارسل سے متعلق کال موصول کرنے والے افراد متعلقہ کوریئر کمپنی سے باضابطہ رابطہ کر کے کال کرنے والے کی شناخت کی آزادانہ طور پر تصدیق کریں۔
یاد رکھیں کہ سائبر کرمنلز بینک، موبائل کمپنی، کوریئر سروس کے نمائندے یا سرکاری ادارے کا افسر بن کر ابھی ٓپ سے فراڈ کر سکتے ہیں۔
