پیٹرول مہنگا، ڈیزل سستا، نوٹیفکیشن جاری
آئل اینڈ گیس ریگولیٹری اتھارٹی (اوگرا) کی جانب سے جاری کردہ نوٹیفکیشن کے مطابق نئی قیمتوں کا اطلاق آج رات 12 بجے کے بعد سے نافذ العمل ہو گیا ہے۔
اوگرا کے نوٹیفکیشن کے مطابق پیٹرول کی قیمت میں 4 روپے 45 پیسے فی لیٹر اضافہ کیا گیا، جس کے بعد پیٹرول کی نئی قیمت 333 روپے ایک پیسہ فی لیٹر مقرر کر دی گئی ہے۔
دوسری جانب عوام کو جزوی ریلیف دیتے ہوئے ہائی اسپیڈ ڈیزل کی قیمت میں 2 روپے فی لیٹر کمی کی گئی، جس کے بعد ڈیزل کی نئی قیمت 383 روپے 86 پیسے فی لیٹر مقرر کی گئی ہے۔
حکام کے مطابق پیٹرولیم مصنوعات کی قیمتوں میں ردوبدل عالمی منڈی میں خام تیل کی قیمتوں، درآمدی اخراجات، روپے کی قدر اور دیگر معاشی عوامل کو مدنظر رکھتے ہوئے کیا گیا ہے۔
نئی قیمتوں کے نفاذ کے بعد ملک بھر کے تمام پیٹرول پمپس پر صارفین کو نئے نرخوں کے مطابق پیٹرول اور ڈیزل فراہم کیا جا رہا ہے۔
ماہرین معاشیات کا کہنا ہے کہ پیٹرول کی قیمت میں اضافے سے نجی ٹرانسپورٹ استعمال کرنے والے افراد اور تجارتی سرگرمیوں پر اخراجات بڑھنے کا امکان ہے، جبکہ ڈیزل کی قیمت میں کمی سے مال برداری اور زرعی شعبے کو کسی حد تک ریلیف مل سکتا ہے۔
یہ بھی پڑھیں:سرکاری ملازمین کی تنخواہوں اور الاوٴنسز کے متعلق وزارت خزانہ کی اہم وضاحت
واضح رہے کہ حکومت ایک روز روز بعد اوگرا کی سفارشات اور عالمی مارکیٹ کی صورتحال کا جائزہ لینے کے بعد پیٹرولیم مصنوعات کی قیمتوں میں ردوبدل کا اعلان کرتی ہے۔
حالیہ فیصلے کے بعد عوام کی نظریں آئندہ قیمتوں کے تعین اور عالمی خام تیل کی صورتحال پر مرکوز ہیں۔
