ڈی جی آئی ایس پی آر آج اہم پریس کانفرنس کریں گے
ذرائع کے مطابق پریس کانفرنس میں ملک بھر میں جاری انسدادِ دہشت گردی کی کارروائیوں، حالیہ سیکیورٹی چیلنجز اور دہشت گرد تنظیموں کے خلاف کیے گئے اقدامات پر تفصیلی بریفنگ دی جائے گی۔ اس موقع پر سیکیورٹی فورسز کی حالیہ کامیاب کارروائیوں اور دہشت گردوں کے خلاف آپریشنز سے متعلق اہم اعداد و شمار بھی سامنے لائے جانے کا امکان ہے۔
یہ بھی پڑھیں: سیکیورٹی فورسز کی مختلف کارروائیاں، 32 دہشت گرد ہلاک
اطلاعات کے مطابق ڈی جی آئی ایس پی آر داخلی سلامتی کی موجودہ صورتحال، سرحدی علاقوں میں سیکیورٹی انتظامات، دہشت گردی کے خلاف ریاستی حکمت عملی اور عوام کے تحفظ کے لیے کیے جانے والے اقدامات پر بھی روشنی ڈالیں گے۔ اس کے علاوہ ملکی سلامتی کو درپیش خطرات، دہشت گرد عناصر کے نیٹ ورکس اور ان کے خلاف جاری انٹیلی جنس بیسڈ آپریشنز سے متعلق بھی اہم نکات بیان کیے جا سکتے ہیں۔
دفاعی امور کے ماہرین کے مطابق یہ پریس کانفرنس ایسے وقت میں ہو رہی ہے جب ملک کے مختلف علاقوں میں سیکیورٹی فورسز نے دہشت گردوں کے خلاف متعدد کامیاب کارروائیاں کی ہیں، جبکہ حالیہ دنوں میں خیبر پختونخوا اور بلوچستان میں بھی آپریشنز کے دوران کئی دہشت گرد ہلاک کیے گئے ہیں۔ اس تناظر میں پریس کانفرنس کو غیر معمولی اہمیت دی جا رہی ہے۔
پریس کانفرنس کے دوران صحافیوں کی جانب سے مختلف قومی سلامتی، دہشت گردی، سرحدی صورتحال اور حالیہ سیکیورٹی واقعات سے متعلق سوالات بھی متوقع ہیں، جن کے جوابات ڈی جی آئی ایس پی آر کی جانب سے دیے جائیں گے۔
