بیرون ملک جانے والے پاکستانیوں کیلئے نئی امیگریشن پالیسی کا اعلان
تفصیلات کے مطابق وفاقی حکومت نے نیشنل امیگریشن پالیسی 2026 جاری کر دی ہے، جس کا مقصد بیرونِ ملک جانے والے پاکستانیوں کے لیے محفوظ، منظم اور باوقار نقل مکانی کو فروغ دینا، افرادی قوت کی مہارتوں میں اضافہ کرنا اور تارکینِ وطن کے حقوق کا تحفظ یقینی بنانا ہے۔
اسلام آباد میں وفاقی وزیر اوورسیز پاکستانیز چوہدری سالک حسین نے نئی پالیسی کا اعلان کرتے ہوئے کہا کہ یہ پالیسی بیرونِ ملک جانے والے ہر پاکستانی کے ساتھ قومی عزم کی تجدید ہے۔
یہ بھی پڑھیں: مسافروں سے بھری فیری الٹ گئی، 41 افراد ہلاک جبکہ 61 لاپتہ
وفاقی وزیر کا کہنا تھا کہ عالمی لیبر مارکیٹ تیزی سے تبدیل ہو رہی ہے اور دنیا بھر میں ہنر مند افرادی قوت کے حصول کے لیے سخت مقابلہ ہے، اس لیے پاکستان کو بھی اپنی افرادی قوت کو مستقبل کے تقاضوں سے ہم آہنگ بنانا ہوگا۔ انہوں نے کہا کہ نئی پالیسی پاکستانی ورک فورس کو عالمی معیار کے مطابق تیار کرنے میں اہم کردار ادا کرے گی۔
چوہدری سالک حسین نے بتایا کہ اس وقت ایک کروڑ 20 لاکھ پاکستانی دنیا کے مختلف ممالک میں مقیم ہیں، جو نہ صرف پاکستان کے سفیر ہیں بلکہ ملکی معیشت میں بھی اہم کردار ادا کر رہے ہیں۔
انہوں نے کہا کہ بیرونِ ملک مقیم پاکستانیوں نے گزشتہ مالی سال 41 ارب ڈالر سے زائد کی ریکارڈ ترسیلاتِ زر بھیجیں، جو قومی معیشت کے لیے انتہائی اہم ہیں۔
وفاقی وزیر نے اس عزم کا اظہار کیا کہ حکومت اوورسیز پاکستانیوں کے حقوق کے تحفظ، ہنر مند افرادی قوت کی تیاری اور عالمی روزگار کے مواقع سے بھرپور استفادہ یقینی بنانے کے لیے پالیسی پر مؤثر عملدرآمد کرے گی۔
