عالمی منڈی میں کمی کا پورا فائدہ عوام کو منتقل کرینگے: وزیر پٹرولیم
پارلیمنٹ ہاؤس کے باہر میڈیا سے گفتگو کرتے ہوئے وفاقی وزیر علی پرویز ملک کا کہنا تھا کہ اس میں کوئی شک نہیں کہ عالمی منڈی میں خام تیل کے نرخ جنگ سے پہلے والی سطح پر آگئے ہیں لیکن پاکستان کو 70 سے 80 فیصد تیل درآمد کرنا پڑتا ہے۔
انہوں نے بتایا کہ اس وجہ سے ہمیں آج بھی پٹرول جنگ سے پہلے کی قیمت کے مقابلے میں 15 سے 20 ڈالر مہنگا مل رہا ہے، اسی وجہ سے وزیراعظم نے پٹرولیم لیوی بھی کم کر رکھی ہے۔
وزیر پٹرولیم کا کہنا تھا کہ عالمی منڈی میں خام تیل کی قیمتیں کم ہونے پر وزیراعظم نے اپنے وعدے کی پاسداری کرتے ہوئے ایک لمحے کی تاخیر کے بغیر پٹرول کی قیمت میں 70 سے 80 روپے فی لٹر کمی کر کے عوام کو ریلیف دیا تھا۔
علی پرویز ملک نے کہا کہ اب بھی جیسے ہی عالمی مارکیٹ میں قیمتوں میں کمی آئے گا اس کا پورا پورا فائدہ فوری طور پر عوام کو منتقل کر دیا جائے گا۔
یہ بھی پڑھیں: ایل پی جی کی قیمتوں میں کمی، گھریلو سلَنڈر سیکڑوں روپے سستا
وفاقی وزیر کا کہنا تھا کہ اوگرا ہر ہفتے عالمی نرخوں کی بنیاد پر پٹرولیم مصنوعات کی قیمتوں کا تعین کرتی ہے اور گزشتہ بیس برس سے یہی طریقہ کار رائج ہے، اوگرا عالمی منڈی میں قیمتوں کی اوسط، درآمدی لاگت اور پی ایس او کے اخراجات کو مدنظر رکھتے ہوئے نئی قیمتیں متعین کرتی ہے۔
انہوں نے کہا کہ وزیراعظم کی ہدایت پر حکومت نے سستے ایندھن کی فراہمی کے لیے 130 ارب روپے کی سبسڈی فراہم کی جس کے ذریعے موٹر سائیکل سواروں اور پبلک ٹرانسپورٹ کو ریلیف ملا۔
