خانیوال: شالیمار ایکسپریس حادثے کا شکار
ریلوے حکام کے مطابق شالیمار ایکسپریس اپنے معمول کے مطابق لاہور سے کراچی جا رہی تھی کہ خانیوال کے قریب اس کی ایک بوگی ٹریک سے اتر گئی، جس کے باعث ٹرین کا نظام متاثر ہوا اور ٹرین تقریباً ایک گھنٹے تاخیر کا شکار ہو گئی۔
حادثے کے فوری بعد ریلوے انتظامیہ نے صورتحال پر قابو پانے کیلئے ملتان سے ریلیف ٹرین روانہ کر دی۔ حکام کا کہنا ہے کہ متاثرہ بوگی کو ٹریک پر واپس لانے اور ٹرین کی روانی بحال کرنے کیلئے امدادی کارروائیاں تیزی سے جاری ہیں، جبکہ شالیمار ایکسپریس کو جلد اپنی منزل کی جانب روانہ کرنے کیلئے تمام دستیاب وسائل بروئے کار لائے جا رہے ہیں۔
دوسری جانب شدید گرمی اور حبس کے باعث ٹرین میں موجود مسافروں کو سخت مشکلات کا سامنا کرنا پڑا۔ کئی مسافروں نے بنیادی سہولیات کی کمی اور تاخیر کے باعث انتظامیہ پر ناراضی کا اظہار بھی کیا۔ خانیوال میں ریلیف کے محدود انتظامات کی وجہ سے امدادی کارروائیوں میں بھی کچھ مشکلات پیش آئیں۔
یہ بھی پڑھیں:پیپلز پارٹی کی سینئر رہنما فوزیہ حبیب خالقِ حقیقی سے جا ملیں
ریلوے حکام نے واقعے کی ابتدائی تحقیقات شروع کر دی ہیں تاکہ بوگی کے پٹڑی سے اترنے کی اصل وجہ معلوم کی جا سکے۔
حکام کا کہنا ہے کہ مستقبل میں ایسے واقعات کی روک تھام کے لیے ٹریک اور ٹرینوں کی مکمل جانچ پڑتال کا نظام مزید سخت کیا جائے گا۔
